طالبانو د کندز علي اباد ولسوالۍ کې اته سرتیري وژلي دي.
یوې امنیتی سرچېنې د نوم نه ښودلو په شرط شمشاد ته وویل، برید تیره شپه د علي اباد ولسوالۍ کوچه قضاق سیمه کې شوی دی.
سرچېنې ویلي، د طالبانو برید کې درې نور امنیتي سرتیري ټپیان شوي هم دي.
د کندز سیمه ییزو چارواکو تر اوسه په دې اړه څه نه دي ویلي خو ویل کیږي چې د افغان سرتیرو په ځوابي برید کې د طالبانو د لیزري قطعي یو مهم غړی هم وژل شوی
طالبانو بیا افغان ځواکونو ته د مرګ ژوبلې اړولو ادعا کړې او وايي، د دوی ملګرو ته زیان نه دی اوښتی.
قطر کې د سولې خبرې
طالبان وايي، قطر کې د دوی چارواکو او امریکايي لوري ترمنځ د راتلونکو اقداماتو په اړه تفصیلي خبرې کړي دي.
د طالبانو په لیکنه، د دوی درې کسیز پلاوي مشرانو ملا برادر ، شیر عباس ستانکزي او مولوي امیر خان متقي له خلیل زاد او جنرال سکاټ میلر سره تفصیلي خبرې کړي دي.
دا چې راتلونکي اقدامات به څه وي طالبانو یې په اړه ډیرجزیات نه دي ورکړي خو ویلي یې دي د مذاکراتي ټیمونو ګډ مجلسونه به نن هم دوام وکړي.
ټاکل شوې وه چې د روان میلادي کال له پیل سره سم د طالبانو او امریکا ترمنځ د سولې هوکړه لاسلیک شي خو د اوربند پر سر اختلاف دغه هوکړه ځنډولې ده.
اوس تازه طالبانو ویلي چې د روانې میاشتې تر پایه ښایي دواړه لوري هوکړه لاسلیک کړي.
له دې سره سم واشنګټن ټایمز خبر ورکړی چې ایران به هڅه وکړي چې د طالبانو او ایران پلوه وسله والو پر مټ امریکا په افغانستان کې ماته کړي
واشنګټن ټایمز امریکایي نشریه په خپل یو مطلب کې لیکي، د سرچینې په خبره همدا اوس طالبان په مشهد او د ایران په ځینو نورو برخو کې مرکزونه لري، د کوټې له طالبانو سره مستقیمه اړیکه لري او ان داسې ګومان کېږي چې ایران طالبانو ته ځینې عملیات هم پلانوي.
واشنګټن ټایمز لیکي چې طالبان د ایران له ملاتړه برخمن دي او دغه هېواد غواړي دوی د امریکا پر وړاندې ودروي.
په مطلب کې وړاندې راځي چې څومره له طالبانو سره د سولې هوکړه ځنډول کېږي دومره له دې فرصت ایران استفاده کوي او همدا اوس هم په دې لټه کې دی چې د سولې مخه ونیسي او له طالبانو سره اړیکې نږدې کړي
