افغانستان کې د بشر حقونو مدافعین له ګواښونو سره مخ دي.
د ولسمشر دویم مرستیال سرور دانش چې د بشر حقونو د مدافعینو د ساتنې لپاره په یو غونډه کې خبرې کولې اندیښنه وښوده چې په تېرو دوو کلونو کې د بشر حقونو مدافعین له سختو ګواښونو سره مخ شوي دي.
د بشر حقونو مدافعین وایي، حکومت دې د دوی د ژوند خوندیتوب لپاره د پام وړ ګامونه پورته کړي او د مدافعینو لپاره دې مرسته کوونکی صندوق جوړ کړي.
د مالوماتو له مخې؛ په دې وروستیو کې افغانستان کې د بشر حقونو مدافعین له سختو ګواښونو سره مخ دي چې یو لړ اندېښنې یې هم راپورته کړي دي.
افغانستان کې د مدافع وکیلانو د ساتنې ډله ګیله کوي چې تر اوسه یې هېڅ داسې ادرس نه دی پیدا کړی چې د دوی پر وړاندې د شته ستونزو په راکمولو کې ورسره مرسته وکړي.
د ولسمشر دویم مرستیال سرور دانش هم مني چې په دې وروستیو دوه کلونو کې د بشر حقونو مدافعین له جدي ګواښونو سره مخ دي.
سرور دانش وایي، مدافع وکیلان په اسانۍ خپل کارونه پر مخ نشي وړی او ګواښونه یې د فعالیتونو پروړاندې خنډ دي.
د افغانستان د بشري حقونو د مدافعینو ډله وایي، تیر زېږدیز کال د بشري حقونو د نقض له پلوه یو سخت کال و چې، ستر لامل یې روانه نا امني او جګړې په ګوته کوي.
د بشر حقونو مدافعین له حکومت غواړي چې د مدافعینو لپاره دې مرسته کوونکی صندوق رامنځته کړي.
