کندهار کې دطبي بوټو د ځينو ډولونو نسل د ورکېدو له ګواښ سره مخ دی.
طبي بوټي چې د افغانستان د صارداتو په نوملړ کې پنځم ځای لري ډېره برخه یې هند هېواد ته لیږل کېږي.
د کرنې ریاست مسوولين وايي، د کندهار طبي بوټي لوړ نوم لري او که په معیاري بڼه یې ساتنه وشي دا وړتیا لري چې د هند تر څنګ ګڼو نورو هېوادونو ته هم صادر شي.
د کندهار د کرنې ریاست د طبیعي سرچینو امر حامد سادات وايي ۴۰ قلمه طبي بوټي لري، خو په غيرقانوني ډول د حاصلاتو ټولولو له امله یې ډېره برخه د ورکېدو له ګواښ سره مخ ده.
په کندهار کې د يوناني ډاکترانو ټولنې غړي او د طبي بوټو سوداګر هم وايي، پخوا په دغه ولايت کې په لوړه کچه بېلابېل طبي بوټي پيدا کېدل، خو اوس دخپل سري ټولونې له امله لږ شوي دي.
دوی وایي، له دې امله اړ شوي، چې په یوناني درملو کې کارېدونکي بوټي له نورو هېوادونو څخه په څو چنده لوړ قیمت وپلوري.
د کندهار په ګډون په یو شمېر نورو ولایتونو کې بېلابیل طبي بوټي شته خو په ځانګړې توګه شیرین بویه او هنجه د افغانستان له شمالي ولایتونو بدخشان، تخار، بلخ او سمنګانه لاس ته راځي.
تر دې وړاندې د کرنې وزرات ویلي وو، چې ځینو ولایتونو کې یې یو شمېر سیمې چې طبي بوټي یې له ګواښ سره مخ و، قرنطین کړې وې او لا هم دغه لړۍ روانه ده.
