حکومت د سولې په پروسه کې د ځوانانو ونډه له پامه غورځولې ده.
د کابل سربېره د دوه ویشتو ولایتونو ځوانان راټول شوي وو او د سولې پروسې په تړاو یې خپل نظرونه او طرحې شریکې کړي.
د دولت په چارو کې د سولې وزارت پر ځوانانو غږ وکړ چې په هر ډول تروریستي ډلو پورې دې ځان نه تړي او د سولې په پروسه کې دې خپل مسؤولیت سر ته ورسوي.
په غونډه کې یادوونه وشوه چې په روانه جګړه کې تر ټولو زیاته قرباني ځوان قشر ورکوي او اړتیا ده چې د سولې په پروسه کې هم پراخه ونډه ولري.
بلخوا د اطلاعات او کلتور وزارت پر ځوانانو غږ وکړ چې خپل ظرفیتونه او وړتیاوې لوړې کړي.
له بل لوري ځوانانو پر حکومت نیوکه وکړه چې د سولې په پروسه کې له پامه غورځول شوي دي او باید د سولې بهیر کې ځوانانو ته ونډه ورکړل شي.
له دوه ویشتو ولایتونو راغلي ځوانان وایي، د ځوانانو په تړاو د دې ډول پروګرامونو جوړېدل تشریفاتي بڼه لري او هیڅکله یې عملې بڼه نه ده خپله کړې، خو د سولې په چارو کې د دولت وزارت بیا د سولې په پروسه کې د ځوانانو پر ګډون ټینګار وکړ.
