د کورنيو چارو وزارت سرپرست وزیر سراج الدین حقاني د اسلامي همکاريو سازمان د علماوو له پلاوي سره کتلي دي.
د اسلامي همکاريو سازمان ویلي، پلاوي یې په دې کتنه کې د نور مسايلو ترڅنګ د نجونو پر زدهکړو او د مېرمنو له پر کار او دغه راز په دې برخه کې د سرپرست حکومت له لوري په شویو پرمختګونو بحث او خبرې شوي.
یاد پلاوي زیاته کړې:« په دې کتنه کې په اسلام کې د زغم او اعتدال، د نجونو د زدهکړو او د ښځو کار په اړه بحث او د نظرونو تبادله شول. زموږ پلاوي په دې برخو کې د افغانستان د اوسنيو چارواکو هڅې واوريدې.»
کورنيو چارو وزارت له لورې په خپره شوې خبرپاڼه کې ويل شوي، په دغه ناسته کې د اسلامي همکاريو سازمان پلاوي ښځو ته د حقونو د ورکړې په برخه کې د سرپرست حکومت د ځينو فرمانونو هرکلی کړی او ټينکار يې کړی چې د نارينهوو ترڅنګ نجونو ته بايد د عصري زدهکړو اساسي حق ورکړل شي.
د خبرپاڼې یوه برخه:« پلاوي د مېرمنو د حقونو په برخه کې د اسلامي امارت د ځينو فرمانونو ستاينه وکړه او په وينا يې ياد فرمانونه توانيدلي چې د ميراث او بدو کې د ورکړې په برخه کې په مېرمنو د ظلم او زياتي مخنيوی کړی. ياد پلاوي غړو زده کړې د نارينه او ښځينه وو ګډ حق ياد کړ.»
په خبرپاڼه کې ویل شوي چې سرپرست وزیر سراج الدین حقاني د نجونو زدهکړې د افغاني تولنې اساسي اړتيا بللي او د دې ستونزې هواري د ډاډ ترڅنګ یې له پلاوي غوښتي چې په دې برخه کې له زغم او صبر کار واخلي.
حقاني زیاته کړې:« زده کړې د مسلمانانو شريکه اړتيا ده او زه له تاسې غواړم چې دې برخه کې له زغم او صبر کار واخلئ، د نجونو زده کړې زموږ د ټولنې اړتیا ده چې له شرايطو سره سم به دغه ستونزه هواره شي.»
سراجالدين حقاني ويلي، په حکومت کې دننه د ټولو شته نيمګړتياوو حل لپاره جدي هڅې روانې دي او حکومت د خلکو مشروع غوښتونو منلو ته ژمن دی.
هغه زیاتوي:« اسلامي امارت چې په کومه بڼه نړۍ ته تشرېح شوی، هسې نه بلکې افغانان له خير او تعامل څخه ډک خلک دي. موږ د هرې مشروع نيمګړتيا د حل په موخه به خپلې هڅې جاري وساتو.»
د اسلامي همکاريو سازمان د علماوو پلاوی تیره اوونۍ هيواد ته راغلی چې تردې دمه يې د بهرنيو چارو سرپرست وزیر مولوي امیرخان متقي، د رياست الوزرا سياسي مرستيال مولوي عبدالکبیر، د کانو او پټرليم وزارت سرپرست شهاب الدين د لاور، د حج اوقافو سرپرست نور محمد ثاقب او د کورنيو چارو سرپرست سراج الدين حقاني سره ليدلي او پر بېلابېلو موضوعاتو يې ورسره خبرې کړې دي.
