اسلامي امارت د پاکستان له لوري د جګړې دوام په صورت کې د دې هېواد پر وړاندې د جګړې دوام ته له چمتووالي خبر ورکوي.
د حکومت مرستیال وياند کابل کې له پوځي رژیم سره د جګړې معلوماتو شریکولو پرمهال وايي، که پاکستان خپل بریدونه ونهدروي، اسلامي امارت چمتو دی چې د خپلو خکو او خاورې دفاع لپاره جګړه وغځوي او غچ اخستنې ته دوام ورکړي.
حمدالله فطرت زیاتوي، جګړه د افغانستان لومړی انتخاب نهدی، خو لومړی ګوزار د پاکستان له لوري شوی او اوس دوی دفاعي جګړې ته ادامه ورکوي.
د اسلامي امارت مرستیال ویاند حمدالله فطرت وايي: « د افغانستان اسلامي امارت د اوږدې جګړې لپاره چمتوالی لري، ترڅو د خپلو خلکو او خاورې دفاع وکړي او د ولسي وګړو د مرګ ژوبلې غچ واخلي. تر هغو چې زموږ پر خاوره تېری او یرغل ادامه ولري او زموږ هوايي حریم نقض کېږي، موږ به هم دفاع کوو او د رد الظلم عملیات به ادامه ولري.»
فطرت د جګړې پای ته رسولو ابتکار د پاکستان په لاس کې بولي او وايي، ترڅو چې پوځي رژیم پر افغانستان بریدونه جاري ساتي، تر هغې به يې پر وړاندې د رد الظلم عمليات هم جاري وي.
فطرت د پاکستان جګړه پروژه يي بولي او وايي، پاکستان د جګړې نوې پروژه اخستې او غواړي د افغانستان په ګډون، ټوله سیمه بېثباته کړي.
د اسلامي امارت مرستیال ویاند حمدالله فطرت په دې اړه وايي: « هغوی په خپل سره نه شي کولی په دومره پراخه کچه پر یوه هېواد تېری وکړي. موږ په دې ښه پوهېږو چې هغوی پروژه اخستې، ترڅو افغانستان او سیمه بې ثباته کړي او پردۍ اجنډاوې تطبیق کړي.»
د چارو څارونکي بیا وایي، پاکستان له کلونو راهیسې له لوېدیځ څخه د ترهګرۍ پر وړاندې مبارزې په نوم د جګړو پروژې اخلي او غواړي له دې لارې د سیمې او افغانستان موجوده سیاسي ثبات له ګواښ سره مخ کړي.
د سیاسي چارو شنونکی اسدالله ندیم وايي: « په دې کې هېڅ شک نه شته چې افغانان یو مبارز، مجاهد او جنګیالی ملت دی، یو کال څه چې سل کاله هم کولی شي له دمې پرته له هر ډول متجاوز سره جګړه وکړي.»
د سیاسي چارو شنونکی احمد خان اندړ وايي: « افغانان اوس د پاکستان په نیت پوه دي او نړۍ هم د هغوی په ظلم خبره ده. دوی به هېڅکله هم داسې کړنې بیا ترسره نه کړي. په دې جګړه کې زموږ بریا حتمي ده.»
د اسلامي امارت چارواکو همدارنګه د هغو غوښتنو او پوښتنو په لړ کې چې په کابل کې دې نور د پاکستان سفارت وتړل شي وویل، تر اوسه له پاکستان سره داسې حالت ته نه یو رسېدلي چې د سفارت تړلو پرېکړه وکړو.
له تېرې یوې اوونۍ راهیسې د افغانستان او پاکستان ترمنځ مخامخ جګړه روانه ده چې په لړ کې یې پاکستاني لوري ته ګڼ مالي او ځاني زیانونه اوښتي.
