د جګړې د اصولو ماتولو په دوام، د پاکستان پوځي رژیم یکشنبه یو ځل بیا د هېواد په یو شمېر سیمو بریدونه او د بریدونو هڅه کړې.
د پاکستان پوځي رژیم الوتکو د ننګرهار په غنيخېلو او د پکتیا په ډنډپټان ولسوالیو کې د عامو خلکو پر کورونو او د ډرون او هاوان مرمیو بریدونه کړي.
په دې بریدونو کې د ښځو او ماشومانو په ګډون نږدې لسو تنو ته مرګژوبله اوښتې او څلور کورونه ویجاړ شوي دي.
د اسلامي امارت مرستیال ویاند حمدالله فطرت وايي: « د پاکستان وحشي پوځي رژیم د جنایتونو په دوام، د ننګرهار غني خیلو ولسوالۍ ۲۹ویاله کې تېره شپه ۱۱بجې د عامو ولسي خلکو پر کورونو ډرون بریدونه کړي چې څلور کورونه په کې ویجاړ شوي، دوه کسه د یوې ښځې په شمول شهیدان او دوه کسه نور ټپیان شوي دي.»
په ورته مهال، د کډوالو وزارت او راستنېدونکو چارو وزارت وايي، پاکستاني جېټ الوتکو په ننګرهار کې د راستنېدونکو پر عمري او کندهار کې پر انځرګي پنډغالو هوايي برید کړي او یو شمېر عامو افغانانو ته یې مرګ ژوبله اړولې. یاد وزارت دا بریدونه بشري جنایت او د نړیوالو اصولو او قوانینو پر وړاندې ترسره شوی اقدام بولي.
د کډوالو او راستنېدونکو چارو وزارت ویاند عبدالمطلب حقاني وايي: «د بې ګناه ملکي وګړو په ضد د جنایتونو پر دوام، د پاکستان پوځي رژیم په مسلسل ډول په تورخم کې د راستنېدونکو مهاجرینو په عمري کمپ او په سپین بولدک کې پر انځرګي کمپ بریدونه کړي. د دغو بریدونو په پایله کې یو شمېر بې ګناه راستانه شوي مهاجرین، ښځې او ماشومان شهیدان او زخمیان شوي دي.»
له دې سره سم دفاع وزارت وايي، پاکستاني جېټ الوتکو شنبه د شپې پر بګرام هوايي اډې د برید هڅه کړې، خو افغان ځواکونو يې مخه نيولې او د پروان مسوولینو په وینا، یادې اډې ته هېڅ ډول زیان نه دی اوښتی.
بل پلو د اسلامي امارت ویاند پر خپله اېکس پاڼه د پاکستاني الوتکو پر وړاندې د دافع هوا د فعالیت او د یادو جېټ الوتکو په نښه کولو له امله کابل ښاریانو ته ډاډ ورکړی.
دفاع وزارت پر ملکي او استوګنیزو سیمو د پاکستان پوځي رژیم د بریدونو دوام په روانه جګړه کې د افغان ځواکونو پر وړاندې د هغوی د پاتې راتلو په مانا بولي.
د ملي دفاع وزارت مرستیال ویاند صدیق الله نصرت وايي: « بل پلو، پاکستاني پوځي رژیم چې تر ډېره یې به مخامخ جګړه کې توان له لاسه ورکړی، په ځینو سیمو کې یې زموږ یو شمېر ملکي وګړي په ړندو بمباریو او د هاوانونو په ویشتلو سره شهیدان او ژوبل کړي دي.»
له دې سره د افغانستان ځواکونو تېره شپه د پکتیا په ډنډ پټان او ځاځي اریوب او د خوست په ځاځي میدان او یو شمېر نورو برخو غچ اخستونکي عملیات کړي او پر درنې مرګ ژوبلې سربېره یې د مقابل لوري پوستې او ګڼ شمېر پوځي مهمات نیولي.
د دې ترڅنګ، افغان ځواکونو کوېټه کې د پاکستان پر قول اردو هوايي بریدونه کړي. سرچینه وايي دغه بریدونه یې د پاکستان پوځي رژیم د تېرې شپې د ړندو بمباریو په غبرګون کې ترسره کړي.
