د ننګرهار ولایتي چارواکو د یو شمېر نړیوالو موسسو په ملتیا تورخم کې د راستنو شویو کډوالو حالت له نږدې وکوت. د چارواکو په خبره، له پاکستانه د راستنېدونکو بهیر تر پخوا لا چټک او شمېر یې زیات شوی.
همدارنګه، د کډوالو د راستنېدنې بهیر مسوولین وایي، اوسمهال هره ورځ تر ۶۰۰ کورنۍ له پاکستان او خیبرپښتونخوا هېواد ته راستنېږي او دا شمېر د پخوا په پرتله زیات شوی دی.
تورخم کې د کډوالو کمپ مسوول هاشم میوند وال وايي: « اوسمهال د ۶۰۰ شاوخوا کورنۍ راځي او ورځ تر بلې زیاتېږي. موده مخکې دا کچه ۳ تر ۴ سوو پورې وه، خو دا کچه اوس له ۶۰۰ اوښتې ده. دا شمېره ښايي نوره هم زیاته شي، ځکه هلته د کډوالو مېشت کمپونو ته ورکړل شوی وخت پای ته رسېدلی او له کډوالو سره ظلم کوي، بندي کوي یې.»
له پاکستانه راستانه شوي هېواد وال هم په پاکستان کې پر افغان کډوالو ورځ تر بلې زیاتېدونکي ظلم له امله خواشیني دي او وايي، هلته نور د کډوالو عزت خوندي نه دی. د دوی په خبره، هېواد ته په راستنېدو سره یې د آرام ساه واخسته.
راستون شوی کډوال صاحب جان وايي: « پاکستانیانو پر موږ کورونه وران کړل، موږ په هر کور له ۶ تر ۷ میلیونه روپیو لګولې وې، خو اوس مو په ۲۰۰ روپيو خرڅ کړل او موږ ترې راغلو. زموږ پیسې او کاروبارو اوس هم په پاکستان کې پاتې دي.»
راستون شوی کډوال کلیم الله وايي: « بېګاه مې لواړګي کې شپه وه، لکه د اختر شپې په شان خوشاله وم. اوس مې ایله د سکون ساه واخسته.»
د ننګرهار اقتصاد ریاست چارواکي بیا د کډوالو له کمپ څخه د لیدنې پر مهال وايي، اسلامي امارت او مرستندویه موسسات د کډوالو ستونزو ته د رسېدو لپاره ژمنتیا لري او اوسمهال د ١٢ کمېټو له خوا کډوالو ته خدمات وړاندې کېږي.
د ننګرهار اقتصاد رییس جان محمد حامد په دې اړه وايي: « موږ خپل نظارت وکړ، که هم خدمات شته، خو موږ د لا زیاتو اسانتیاوو او خدماتو غوښتنه وکړه. په دې اړه موږ ته ډاډ او اطمینان راکړل شوی.»
د مسولینو له خوا د کډوالو ستونزو ته د رسېدو ژمنې داسې مهال کېږي چې د ننګرهار په ګډون د هېواد په یو شمېر ولایتونو کې کډوالو ته د سر پناه په موخه د ځمکو وېش هم پیل شوی.
په ورته مهال، د اسلامي امارت د مشرتابه له حکم سره سم، په ټولو ولایتونو کې راستنو شویو کډوالو ته د خوراکي غنمو او نغدو پیسو وېش هم پيل شوی دی.
