له پاکستان د سوداګریزو لارو له تړلو وروسته، داخلي توليداتو ته د خلکو پاملرنې پانګوال هڅولي چې د خپلو تولیداتو کچه لوړه کړي.
په کندهار کې د چرګ غوښې د تولید يو خصوصي شرکت هره مياشت شاوخوا يو نيم ميليون د غوښينو چرګوړي تولیدوي.
د دې شرکت مسوولين وایي، پر دې شرکت ۵ ميليون ډالره پانګونه شوې، خو بیا هم بسنه نه کوي. دوی د تخم لرونکو هګيو تولیدولو د فارمونو ډېرېدو غوښتنه کوي.
د چرګوړو د تولیدي شرکت مسوولی محمد ادريس وايي: « وطن دانه سنتي کمپنۍ کې د میاشتې یو نیم میلیون چرګوړي تولیدېږي. موږ په دې برخه کې ۳۰ سلنه له داخلي هګیو او ۷۰ سلنه له بهرنیو هګیو ګټه اخلو. د اسلامي امارت په همغږۍ تجاران هڅول شوي چې لا ډېره پانګونه وکړي. زموږ اساسي غوښتنه داده چې حکومت زموږ ملاتړ وکړي.»
بله خوا، د کندهار کرنې، اوبو لګولو او مالدارۍ رياست مسوولين وایي، هره مياشت په دې ولايت کې نږدې ۲ ميليونه د غوښو لپاره چرګوړي تولیدېږي او دا کچه د کندهار د فارمونو ۷۰ سلنه اړتيا پوره کوي.
مسوولين زياتوي، دا مهال د کندهار فارمونه ۳ ميليونه چرګوړو ته اړتيا لري او تمه شته چې په نږدې راتلونکي کې دا اړتيا پوره شي.
د کندهار کرنې، اوبو لګولو او مالدارۍ رياست وياند محمد حنيف حقمل وايي: « په کندهار کې موږ د هګیو له ټولو فارمونو څخه ټوټال ۱ میلیون او ۹۵۰ زره چرګوړي تولیدوو، خو دا د کندهار ۷۰ سلنه اړتیا پوره کوي. په کندهار کې اوس هره میاشت ۳۰۰ زره چرګوړو ته اړتیا ده. دا مهال په کندهار کې د غوښو د تولید لپاره ۲۱۰ فارمونه لرو.»
د دې تر څنګ، په دې فارمونو کې په کار بوخت کسان وایي، دوی په هېواد کې خپلو خلکو ته کار کوې او له دې امله ډېر خوښ دي. دا کارګران غوښتنه کوي چې نور پانګوال دې هم په دې برخه کې پانګونه وکړي.
د چرګوړو د یوه خصوصي شرکت کارکوونکی محمد عابد وايي: « زه ډېر خوښ یم چې هېواد کې راته د کار زمینه برابره شوې. زه له نورو پانګوالو هم غوښتنه کوم چې راشي او په خپل هېواد کې خلکو ته د کار زمینه برابره کړي.»
د یوه بل خصوصي شرکت کارکوونکی عبدالرفېع وايي: « دا خدای شکر دی، زه ډېر خوښ یم چې هېواد کې راته کاري فرصت برابر دی. موږ په خپل هېواد کې د خپلو خلکو لپاره خواري کوو.»
په کندهار کې دا مهال سلګونه د غوښينو او هګۍ اچوونکو چرګانو فارمونه شته چې تولیدات یې د کندهار ترڅنګ د هېواد نور ولايتونه ته هم استول کېږي.
