د جـــــــــلال اباد ښار د بهسودو سیمې دویم پل د تېر حکومت پرمهال د ټرافیکي بې نظمۍ او ګڼه ګوڼې پای ته رسولو په موخه جوړ شو، خو بیا هم بې نظمي او ګڼه ګوڼه په خپل حال پاتې شول.
له دې پله نیولې تر بلندغر بازار پورې هره ورځ خلک د ډېرې ګڼه ګوڼې له امله سخت کړاو سره مخامخ دي او نه شي کولی خپلو ورځنیو کارونو ته په وخت ورسېږي.
د دې سیمې خلک شکایت کوي چې ډېری وخت یې ناروغان په وخت روغتون ته د نه رسېدو له امله ژوند بایلي.
د جلال ابا ښار اوسېدونکی بخت جان وايي: « د بهسودو سړک ډېرتنګ دی، دا پراخول غواړي. دا سړک د عاجلو پېښو پرمهال د ډېر تکلیف سبب کېږي او نه شي کېدای ناروغ یا ټپي په بېړنۍ توګه روغتون ته ورسول شي.»
د جلال اباد ښار اوسېدونکی میرویس وايي: « له جلال اباد څخه تر کامې دوسرکې پورې ډېر مشکلات دي او هر سړی ورسره مخامخ دی. دا سړک یستوی دی او موږ له دولت څخه د دې سړک د پراخېدو غوښتنه کوو.»
د جلال اباد ښار اوسېدونکي د دې ستونزې حل د جلال اباد – کونړ د لویې لارې پراخول او همداراز له بهسودو پله ترعبدالخېلو سیمې پورې د پلان شوي ۴۰ متره سړک چې ۱۲.۸کیلومټره اوږدوالی لري، د جوړولو بشپړول په ګوته کوي.
د جلال اباد ښار اوسېدونکی ګل رحیم وايي: « که دا سړک ژر جوړ شي، د خلکو ستونزې به کمې شي. بله خبره د قلعه جانان خان سړک او کونړ اډې سړک هم له ډېرو ستونزو سره مخ دي او هر وخت د دوی له لاسه پل بند وي.»
د جلال اباد ښار اوسېدونکی عبد الرووف وايي: « له بلند غر څخه تر دې ځایه ډېر رش وي او په ساعتونو څوک نه شي رسېدی. مامورین وظیفو ته نه شي رسېدی او ناروغان روغتون ته.»
د جلال اباد اوسېدونکی بخت جان وايي: « زموږ غوښتنه دا ده چې دا سړک پراخ شي او دوه لینه شي. همدارنګه هغه ۴۰ متره سړک چې د دامان او وچ تنګي په لار را روان دی، اړتیا ده چې ژر جوړه شي.»
ومو غوښتل د بهسودو له پله ترعبدالخېلو سیمې د ۴۰ متره سړک د پاتې کارونو د پیل په تړاو په ننګرهار کې د ټولګټو چارو ریاست او همدارنګه ولایتي ادارې نظر ولرو، خو له پرله پسې اړیکو او انتظار وروسته هم په دې اړه څوک نظر ورکولو ته چمتو نه شول.
په کونړ – جلال اباد لویه لار د شته ګڼه ګوڼې کمښت او خلکو ستونزو حل په موخه د پخواني حکومت پر مهال له بهسودو پله ترعبدالخېلو سیمې پورې د څلوېښت مترو په پلــــــــنوالي او د ۱۲.۸ کیلومټرو په اوږدوالي د یوه سړک جوړېدو چارې پیل شوې وې، خو د اسلامي امارت تر واکمنېدو وروسته د دې سړک چارې همداسې نیمګړې پاتې او له امله یې خلک له ستونزو سره مخ دي.
