له ولایتونو سربېره په پلازمېنه کابل کې هم خلک شکایت کوي چې په وروستیو کې د خوراکې توکو بيې لوړې شوي او دوی يې د اخیستو وس نه لري.
دوی ځينې سوداګر ګرموي چې ګني له پاکستان سره د لارو بندېدو په پلمه په خپلسرې توګه په بازار کې د توکو بيې لوړوي او حکومت هم ترې څارنه نه کوي.
د کابل ښار یو تن اوسېدونکی وايي: « د پاکستان د لارو بندېدل پلورونکو ته یوه بهانه ګرځېدلې، په داسې حال کې چې سوداګر د یوه پاکستان په ځای اوس ټولو ګاونډیانو او نړۍ هېوادونو ته لارې لري. اوس د خوراکي توکو بيې له ۲۰ تر ۳۰ سلنو لوړې شوې دي.»
د کابل ښار یو بل اوسېدونکی وايي: « د پاکستان د لارو تړل کېدو له امله د توکو بیې لوړې شوې، خو د لارو تړل کېدل یوه بهانه او دروغ دي. موږ ځینې توکي له پاکستانه واردول، خو اوس له ایرانه راځي، نو ولې یې باید نرخونه پورته شي؟»
په ورته مهال، هټۍوال وايي د خوراکې توکو بيې په تېرو څو ورځو کې د سالنګ لارې بندېدو له امله څه ناڅه لوړې شوې، خو په خبره يې د تېر په پرتله ډېرې ټيټې شوې دي. دوی وايي، د حکومت له خوا نرخنامې ورکړل شوې او هېڅوک ترې سرغړونه نه شي کولی.
هټۍوال سیدمحمد وايي: « د نرخونو لوړېدو لامل د موټرو کرایه ده. کله چې واوره وشي او لارې بندې شي، نو کرایه هم لوړه شي. چې لاره خلاصه شي، بېرته به نرخونه هم ټیټ شي.»
د خوراکي توکو د پلورونکو ټولنې مرستیال حاجي زلمی وايي: « دا هسې آوازې دي، زه فکر نه کوم تاجران دې دا ظلم وکړي، نرخونه کنټرول دي او داخلي فابریکې د تولید په حال کې دي، هېڅ ستونزه نه شته، زه دا هرڅه ردوم.»
بله خوا، ځينې پانګوال هم ادعا کوي چې يوه خاصه کړۍ په بازارونو کې د توکو او په ځانګړې توګه د خوراکي توکو بيې په خپل سر لوړوي او د خلکو اقتصادي ستونزې په پام کې نه نيسي.
سوداګر عبدالنصیر ریښتیا وايي: « موږ نه شو کولی ټول پانګوال ملامت کړو، خو په بازار کې ځینې مافیايي کړۍ شته چې په احتکار او انحصار لاس پورې کوي. دوی د مارکېټ د تقاضا له مخې کار نه کوي، نو تر هغو چې د دې کار مخه ونه نیول شي، دا ستونزه به هم جاري وي. زما نظر دا دی چې نور شرکتونه هم مداخله وکړي، حکومت هم لاس په کار شي او په بازار کې د پانګونې لپاره زمینې ډېرې شي. هرڅومره چې پانګونه ډېره شي، مثبت اغېز لري.»
د ریښتیا په خبره، له پاکستان سره د لارو تړل کېدو نه یوازې د خوراکي او غیر خوراکي توکو په نرخونو هېڅ اغېز نه دی کړی بلکې اوس افغانستان له ۸۰ هېوادونو سره راکړه ورکړه لري.
د کابل ښاروالي هم مني چې د ځينو واردېدونکو توکو بيې لوړې شوي، خو په خبره يې د کنټرول په موخه یې نرخنامې چمتو شوې او ژر به په بازار کې ووېشل شي.
د کابل ښاروالۍ استازی نعمت الله بارکزی وايي: « اوس مهال د افغانستان د ملي کرنۍ (افغانۍ) د امریکايي ډالر په مقابل کې ډېر ښه دی، خو ځینې نور مسایل هم شته چې د بیو په ټاکلو کې اساسي فکټورونه دي. دا چې موږ خپل اکثریت لومړني مواد له بهر څخه راوړو، نو ځینې مسایل په کې دخېل دي. کابل ښاروالي دې موضوع ته متوجه ده او نوې نرخ پاڼه به سبا په بازار کې ووېشل شي چې په کې د اوړو او غوړیو په ګډون د ځینو توکو نرخونه ټیټ شوي.»
له دې وړاندې د کابل اوسېدونکو دا شکايت هم درلود چې د ژمي په را رسېدو سره د سون توکو بيې لوړې شوې او دوی نه شي کولی په ارزانه به يې وپېري.
