پنجشیر هغه ولایت دی چې اکثریت ولسوالۍ يې د غرونو په منځ کې پرتې دي. هوا يې سړه او يو شمېر اوسېدونکي يې په غرنیو او صعب العبورو سیمو کې اوسېږي.
خو د ژوند هغه کړاوونه يې چې له امنيتي وضعيت سره تړلي وو، ختم شوي دي. والي يې ډاډه دی چې اوس د پنجشېر اوسېدونکي په ډاډمن امنيت کې ژوند کوي او له دې پلوه هېڅ اندېښنه نه لري.
پنجشېر والي حافظ محمد اغا حکیم وايي: « د افغانستان ټول ولس ته له دې ځایه اطمینان ورکوم چې پنجشېر د افغانستان په ۳۴ ولایتونو کې تر ټولو امن ولایت دی. د کورنیو چارو وزارت د شمېرو له مخې، پنجشېر تېر کال هم لومړی درجه امن ولایت او سږ کال هم امن ولایت دی. د پنجشېر ټول خلک له امنیت راضي دي او هر څوک په خپل کار بوخت دی، په تېرو درېیو کالو کې هېڅ ډول امنیتي پېښه نه ده شوې.»
نه يوازې دا چې تېرو کلونو کې په پنجشېر کې امنيتي پېښې نه دي شوي بلکې چارواکي يې دلته د جنايي جرمونو د کچې خورا ټيټوالي خبر هم ورکوي.
دوی وايي، اوس يې ټوله هڅه په دې ولایت کې د بیا رغونې پروژو پر تطبيق او عامه خدمتونو ته د خلکو د لاسرسي لا زياتول دي.
پنجشېر والي په دې اړه وايي: « د جنايي پېښو په اړه باید درته وایم چې پنجشېر ولایت کې موږ تر ټولو لږې پېښې او حادثې لرو. موږ یوځل کورنیو چارو وزارت ته لاړو، هغوی وویل چې ولې د پېښو راپور نه ورکوو؛ زموږ ځواب دا و چې هلته پېښې نه شته، نو راپور د څه شي درکړو.»
له ولسوالیو سربېره د مرکز بازارک اوسېدونکي، دوکانداران او کارګران ټول په خپلو عادي کارونو بوخت دي او خوښ دي چې په ډاډه زړه له وېرې پرته خپل کارونه کوي.
هټۍ وال سیدالرحمان وايي: « امنیت ښه دی، آرامي ده او خلک په خپل کاروبار او روزګار بوخت دي.»
هټۍ وال اسدالله وايي: « وضعیت ښه دی، تاسو وینئ چې خلک په خپلو کارونو بوخت دي، سوداګري کوي او خوښ دي.»
کاروباري وحیدالله امیري وايي: « د خدای فضل دی کاروبار ښه دی او امنیت هم تأمین دی. که څه خبره وي، چارواکي او مسوولین هم له خلکو سره همکاري کوي.»
د کاني زېرمو له پلوه هم پنجشېر د هېواد په کچه له غني ولایتونو دی او زمرد يې نړيوال شهرت لري. اوس يې استخراج د حکومت تر څارنې لاندې ترسره کېږي او هملته د سوداګرو ترمنځ د آزادې داوطلبۍ له لارې پلورل کېږي.
