وروسته له هغې چې د اسلامي امارت له لوري د سوالګرو راټولولو او تفکیک کمپاین پيل شو، ورسره یو شمېر ادارو ته سپارښتنه وشوه چې اړمنو سوالګرو سره د روزګار برخه کې همکاري وکړي.
ننګرهار کې د شهیدانو او معلولینو ریاست او امنیه قومندانۍ په ګډه دغه بهیر مخ ته وړي.
تازه يې ۲۰۰ تنو سوالګرو سره د خوراکي او غیر خوراکي توکو د مرستې مراسمو کې وویل، د سوالګرو لپاره يې د حرفوي زده کړو او روزګار برابرولو هڅې چټکې کړې دي.
د ننګرهار شهیدانو او معلولینو چارو رییس محمد صابر ځواک وايي: « د دوی استعداد ته په کتو، هغه کسان حرفوي زده کړو ته معرفي کېږي چې کولی شي دا زده کړې وکړي. همدارنګه پرځان بسیاینې لپاره نورو موسسو سره هم خبرې شوې، هغوی ته معرفي کېږي، دوی ته کوچني کاروبارونه برابر شوي او نور هم برابرېږي.»
په همدې حال کې راټول کړای شوي اړمن کسان او سوالګر د لنډمهاله مرستو په ځای پر دایمي او داسې همکاریو ټینګار کوي چې له مخې يې روزګار برابر او په دایمي ډول ستونزه حل شي.
له سوال راګرځول شوی سرکاتب وايي: « زه غواړم ماته د کار زمینه برابره کړي؛ که ما او نورو کسانو ته د کار زمینه برابره شي، هېڅوک به ګدايي ونه کړي.»
له سوال راګرځول شوی لعل ګل وايي: « که چېرې موږ ته کاروبار برابر شي، زه مطمئن یم چې بیا به ګدايي نه وي. زموږ پیغمبر خلک کار ته راجع کړي او له سوال کولو یې منع کړي. موږ بس د کار غوښتنه کوو نه د خیرات.»
د ننګرهار امنیه قوماندانۍ مسوولین چې د سوالګرو د راټولولو کمیسیون مشري کوي وایي، روان کال په دې ولایت کې یو زر ٣٨٢ سوالګر راټول کړای شوي چې ٤٤٠ تنه یې مستحق پېژندل شوي او د حکومت او مرستندویه ادارو له خوا یې مالي ملاتړ کیږي.
د ننګرهار امنیه قوماندانۍ ویاند سید طییب حماد وايي: « په روان کال کې مو ۱۳ سوه ۸۲ تنه سوالګر راټول کړي چې له ډلې یې ۴۴۰ تنه مستحق پېژندل شوي، ۳۶۰ تنو سره د نشه يي توکو پر وړاندې مبارزې مدیریت له خوا مرسته شوې او ۲۶۰ تنو ته هم د افغاني سرې میاشتې ټولنې خوا د کورنۍ د غړیو شمېر ته په کتو معاش ورکړل شوی؛ همدارنګه ۷۶ تنه هم د بېلابېلو مرستندویه ټولنو او موسسو له خوا تمویلېږي. دغه راز ۳۸ کورنۍ اوس مهال د افغان سرې میاشتې په مېلمستون کې دي.»
ننګرهار کې د سوالګرو راټولولو کمیسیون مسوولین وایي، د حکومت په شمول د افغاني سرې میاشتې ټولنې او نورو همکارو ادارو له لارې، راټول کړای شویو سوالګرو ته د حرفوي زده کړو برابرولو سربېره، د دوی مالي ملاتړ ترسره کېږي او بې سرپرسته سوالګر ماشومان بیا په روزنتونونو کې ساتل کېږي.
