د طالبانو اسلامي تحریک او په هېواد کې د اسلامي امارت بنسټ اېښودونکي ملامحمد عمر مجاهد د مور بي بي د دعا یا فاتحې مراسم به سه شنبه په کندهار کې د عمر په جامع جومات کې ترسره شي.
د اسلامي امارت ځینو جګپوړو چارواکو د ملا محمد عمر مجاهد د مور بي بي د وفات له کبله د تسلیت پیغامونه استولي او د مرحومې د مغفرت دعای یې کړې.
د اسلامي امارت ویاند ذبیح الله مجاهد هم په یوه پیغام کې په دې اړه د خپل تسلیت په وړاندې کولو سره ویلي، د ملا محمد عمر مجاهد مور د شنبې په ورځ ناوخته وفات شوه او یکشنبه د کندهار په عیدګاه کې د جنازې د لمانځه له اداکولو وروسته خاورو ته وسپارل شوه.
ذبیح الله مجاهد د اسلامي امارت ویاند ویلي: « د ملا محمد عمر مجاهد د مور بي بي د جنازې په مراسمو کې د اسلامي امارت او د کندهار لوړ پوړو ځايي چارواکو او یو زیات شمیر عامو خلکو ګډون کړې وو. د مرحومې لپاره د دعا یا فاتحې مراسم به د سه شنبې په ورځ په کندهار کې د عمر په جامعه کې د یوې ورځې لپاره واخستل شي.»
همداراز د اسلامي امارت یو شمېر نورو جګپوړو چارواکو هم د هېواد دفاع وزیر مولوي محمد یعقوب مجاهد او د دوی کورنۍ ته د ډاډ ګېرنې او تسلیت پیغامونه استولي دي.
په دې پیغامونو کې د ملا محمد عمر مجاهد مور بي بي د نازو انا چې میرویس نیکه یې زیږولی و او زرغونه انا چې احمد شاه ابدالي یې زیږولی و، ورته یوه مېړنۍ مېرمن بللې او ویلي یې دي چې مرحومې خپل زوی داسې وروزلو چې په هېواد کې یې د اسلامي نظام بنیاد کېښود او د شرعیت قانون یې نافذ کړ.
د اوبو او انرژۍ وزیر عبداللطیف منصور وايي: « غواړم په دې فرصت کې د خپلې همدردۍ او تسلیت پیغام د هېواد دفاع وزیر مولوي محمد یعقوب مجاهد، د دوی محترمې کورنۍ، د اسلامي امارت مشرتابه او ټول ملت ته وړاندې کړم. ملا محمد عمر مجاهد د صلیبي ِیرغل پر وړاندې په حکمت او تدبیر او فراست سره مجاهدین منظم کړل او د سپېڅلي جهاد مرچلو ته یې سوق کړل او په خپله ایماني جزبه یې یرغلګرو له خاورو سره خاورې کړل.»
د یادونې وړ ده چې ملا محمد عمر مجاهد، په نویمه لسیزه کې هغه مهال چې هېواد د کورنیو جنګونو په اور کې سوځېده، عام خلک د بېلابېلو ډلو او قومندانانو له خوا ځورول کېدل، کور، مال او ځان یې خوندي نه وو او په ټول هېواد کې پاټکونه پراته وو، د یاغي ډلو په وړاندې راپور ته شو او په ډېر کم وخت کې یې اتیا سلنه خاوره د طالبانو د اسلامي تحریک تر کنټرول لاندې راوسته.
ملا محمد عمر مجاهد په هېواد کې د اسلامي نظام په واکمنولو سره اسلامي شرعیت نافذ کړ او بې سارې سوله یې ټینګه کړه.
دا نظام بیا وروسته د نړیوالو دسیسو په نتیجه کې هېواد یوځل بیا د بهرنیونیانو له خوا تر یرغل لاندې راغی، خو وروسته له شل کلنې مبارزې دا دی یو ځل بیا په هېواد کې اسلامي نظام واکمن او د شرعیت قانون نافذ دی.
