د (SA Defensa) په نوم د نړیوالو دفاعي موضوعاتو څارونکې رسنۍ د راپور پر بنسټ، امریکا هغه بلک هاوک چورلکې چې په ۲۰۲۱ زېږدیز کال کې ځينو ګاونډيو هېوادونو ته وړل شوې وې، پېرو هېواد ته ورکړې دي.
د یادې رسنۍ په راپور کې که څه هم د دې چورلکو د کره شمېر په اړه څه نه دي ویل شوي، خو لیکل شوي چې دا چورلکې موده وړاندې کولمبیا ته وړل شوې وې او اوس له دې هېواده څخه پېرو ته لېږدول شوې دي.
راپور کې دغه راز راغلي: « متحده ایالاتو پېرو ته د هغو بلک هاوک هلیکوپټرو دویمه جوپه وسپاره چې پخوا د افغانستان حکومت له ځواکونو سره وې. له دې مخکې دغه چورلکې په ۲۰۲۲ کال کولمبیا ته لېږدول شوې وې چې اوس له دې هېواده پېرو ته ورکړل شوې.»
د راپورونو په اساس، د امریکا دفاع وزارت له دې وړاندې ګاونډيو هېوادونو ته د افغانستان وړل شویو چورلکو له ډلې ۷ باله بلک هاوک چورلکې چې د دوی په باور د الوتنې لپاره مناسبې وې، له اوزبېکستان څخه کولمبيا ته لېږدولې وې.
که څه هم اسلامي امارت د امریکا دې کار ته تازه څه غبرګون نهدی ښودلی، خو له دې وړاندې یې څو ځله له ازبېکستان او تاجيکستان څخه د دې چورلکو د بېرته سپارلو غوښتنه کړې.
د پوځي چارو یو شمېر شنونکي له افغانستان سره د امریکا پر نظامي ژبه او چلن نیوکه کوي. د دوی په خبره، په تېر کې را وړل شوي ټول نظامي وسایل او وسایط د افغانستان حق دی او هېڅ هېواد یې ترې د اخیستلو حق نه لري.
د پوځي چارو شنونکی اخترمحمد راسخ وايي: « هر هغه نظامي وسایط، سپکې او درنې وسلې، الوتکې او نور هرڅه چې له اشغالګرو څخه پاتې دي، دا د افغانستان حق دی. دلته یوازې امریکا نه بلکې ۴۸ هېوادونه وو او له ټولو څخه وسلې او وسایط پاتې شول. امریکا افغانستان ته ټولې راوړې وسلې او تجهیزات د ناټو او نړۍ پر نورو هېوادونو محاسبه کړي او پیسې یې اخیستې دي. دوی اوس حق نه لري چې دا وسلې بېرته واخلي.»
امريکا د افغانستان ځينې هغه چورلکې چې اوکراين ته د ترميم لپاره وړل شوې وې هم، واک ته د اسلامي امارت له رسېدو او په اوکرايين کې د جګړې له پيل سره سم، دغه هېواد ته ورکړې.
