پکتیا زندان کې د زندانیانو لپاره د حرفوي او عصري زده کړو پنځه میاشتنې دوره پای ته ورسېده.
زندانیان په دې موده کې ترلاسه کړې زده کړې مهمې بولي او ډاډ ورکوي چې د بند مودې له پوره کېدو وروسته به له همدې زده کړو په ګټه اخیستنې سالمې بوختیاوې ولري.
پکتیا زندان کې بندي قلم الدین وايي:« بندیان دلته ښه وروزل شول او چې له دې ځایه آزاد شي، انشاالله بیا به دا ډول جرمونه نه کوي. ډېر داسې کسان راغلل چې په هېڅ هم نه پوهېدل، خو له دې ځایه چې ووتل اوس خپل کاروبار لري.»
یوبل بندي مطیع الله وايي: « دا زده کړې هر انسان ته ګټه کوي او ژوند کولو ته یې هڅوي. »
یو بل بندي احمد غني وايي: « په دې زده کړو کې د انګلیسي ژبې کورس، نجاري، کمپیوټر او نورې زده کړې ورکول کېږي او ترڅنګ یې ورزشي فعالیتونه هم شته دي.»
په ورته مهال، د دې زندان مسوولین وايي، لا هم په زندان کې شته بندیانو ته په بېلا بېلو برخو کې زده کړې ورکوي او تمه ده چې په آزادېدو سره به ترې د ژوند چارو کې استفاده وکړي.
د پکتیا زندان رییس عبدالغني عادل وايي: « ټولو بندیانو ته په خپلو ټولګیو کې د مسلکي ښوونکو له خوا درس ورکول کېږي. راتلونکي کې پلان لرو چې بندیانو ته نور پروګرامونه هم په لارو واچوو، ترڅو موږ ته د مجرم په توګه را سپارل شوی کس ټولنې ته د یوه پوه، لایق او په یوه مسلک سمبال کس په توګه ور واستوو.»
د مسوولینو په خبره، دغه پروګرامونه د بندیانو د بند مودې په ښه ډول تېرېدو او د تر بند وروسته د ژوند تېرولو او کورنۍ ته د نفقې برابرولو په موخه پيل شوي دي. مسوولین دغه راز وايي، دا مهال په پکتیا زندان کې شاوخوا ۵۰۰ تنه د بند موده تېروي.
