د هرات سیمهییز چاروکي وایي، د ایران د رضوي خراسان ولایت د والي په مشرۍ ایراني پلاوی به په هرات کې له ځایي چارواکو سره د دوه اړخیزو اقتصادي او سوداګریزو اړیکو پر پراختیا او د اسلام کلا – دوغارون پر سوداګریزه لار، د لا زیاتو اسانتیاو برابرولو په اړه خبرې وکړي.
د هرات والي ویاند محمد یوسف سعیدي وایي، د ایران د رضوي خراسان ولایت څخه ورغلی پلاوی به د دواړو هېوادونو ترمنځ د پخوانیو هوکړو ارزونه هم وکړي.
د اقتصادي چارو شنونکي بیا وایي، له پاکستان سره د افغانستان سوداګریزو چارو له پرې کولو وروسته ګاونډي هېوادونه هڅه کوي چې له افغانستان سره مثبتې سوداګریزې اړیکې وپالي.
افغان سوداګر عبدالجبار ساپی وايي: « موږ په دې پوهېږو چې له پاکستان سره د افغانستان د تجارت صفر کولو ایران ته یو ستر چانس په لاس ورکړی او له امله یې ایران سره زموږ سوداګري میلیاردونو ډالرو ته پورته شوه. ایراني چارواکي وايي، له افغانستان سره د دوی تجارت له ټولې اروپا سره تر تجارت ډېر دی. ایراني حکومتي چارواکي او خصوصي سکټور هڅه کوي د افغانستان مارکېټ خپل کړي او د همدې لپاره سهولتونه او امتیازات ورکړي.»
له پاکستان سره د افغانستان د سوداګریزو چارو له بندولو نږدې یوه میاشت تېرېږي. له همدې فرصت څخه په ګټه اخیستنې، یو شمېر هېوادونه هڅه کوي چې له افغانستان سره په اقتصادي او سوداګریز ډګر کې پراخه راکړه ورکړه پيل کړي.
د اقتصادي چارو شنونکي باور لري چې ایران د سیمې او ګاونډیو هېوادونو له ډلې داسې هېواد دی چې په سوداګریزو او اقتصادي چارو کې د پاکستان ښه بدیل کېدلی شي.
د اقتصادي چارو شنونکی یونس ځدراڼ وايي: « دا چې په اوسنیو حالاتو کې له پاکستان سره د افغانستان سوداګري بنده ده، نو د دې لپاره ایران یو ښه بدیل دی. موږ کولی شو د ایران د چابهار بندر له لارې خپل صادرات او واردات لا ډېر کړو. له بلې خوا د ایران لپاره هم د افغانستان مارکېټ ډېر مهم دی، د تېلو او ټکنالوژۍ په برخه کې هم ایران ښه شریک پاتې شوی او افغانستان ته ګټه رسولی شي.»
د یادولو ده چې د پاکستان پوځي رژیم له تېرو څو میاشتو راهیسې قصداً له افغانستان سره سوداګریزې لارې تړلې دي، خو په غبرګون کې یې اسلامي امارت هم له دې هېواد سره سوداګریز پرېکون اعلان کړ.
له هغه وروسته د اسلامي امارت لوړ پوړي چارواکي په ځای نه دي ناست او د بدیلو لارو د موندلو لپاره یې د سیمې په کچه پراخې هڅې او کار پیل کړي دي.
له هند وروسته، د صنعت او سوداګرۍ وزیر ترکیې ته تللی او هلته یې د سوداګریزو اړیکو د پراخولو په لارو چارو خبرې کړې دي.
