د پښتون ژغورنې غورځنګ یو ځل بیا په خیبرپښتونخوا کې د پاکستان پوځي رژیم پر سیاسي تګلارو نیوکه کړې او ویلې یې دي چې هتله هره ورځ د دوی د تګلارو له امله ولسي خلک قرباني ورکوي.
د دې غورځنګ مشر منظور احمد پښتین وایي، د پاکستان پوځي رژيم په خیبرپښتونخوا کې جوماتونه او ولسي خلک په نښه کوي. د نوموړي په خبره، د جمعې په ورځ د پاکستان پوځ د مستعمره پښتونخوا د باجوړ، خار تحصیل کوثر کلي کې یو جومات په نښه او شهید کړی دی.
پښین زیاته کړې، د پاکستاني پوځ له خوا د دغو بریدونو په دوام د شنبې په ورځ هم د بنو په اکبرعلي خان کلي کې یو جومات په نښه کړی چې په کې درې لمونځ کوونکي ټپیان شوي دي.
د پښتون ژغورنې غورځنګ مشر منظور احمد پښتین ویلي: « پاکستان د پښتنو مخکښ او خیرخوا کسان لادرکه کوي، خو برعکس هغه خلک ستایي چې د خیبرپښتونخوا د کورونو، بازارونو، جوماتونو د ړنګولو او د بې ګناه پښتنو په نسل وژنه کې ښکیل دي.»
د پښتون ژغورنې غورځنګ مشر همدارنګه د پاکستان پر پوځي رژیم نیوکه کړې چې هره ورځ په خیبر پښتونخوا کې د دوی د تګلارو له امله ولسي خلک قرباني ورکوي.
منظور پښتین پرهغو رسنیو، خبریالانو او نورو سیاسي فعالانو هم نیوکه کړې چې د پاکستان پوځ پر کړنو سترګې پټوي.
د پښتون ژغورنې غورځنګ مشر منظور احمد پښتین ویلي: « پر پښتنو روان ظلم، جبر، بېعزتۍ او بې حرمتۍ په هېڅ حساب نه شماري، خو که د پښتنو قاتل پوځ او جنرالانو د خوشحالولو ځای راشي، نو څو ورځې یې ستاینې روانې وې او دفاع یې کوي. نه پوهېږم دا ډول خلک به له پښتنو سره د تاریخي جفا نه وروسته په کوم نظر د دې وطن له خاورې او غرونو سره سترګې مخامخ کوي.»
د پښتون ژغورنې غورځنګ یو شمېر نور فعالان هم وایي چې په خیبرپښتونخوا کې د پاکستان پوځي رژیم کړنو ته یو شمېر سیاسي کړیو لار پرانېستې ده. د دوی په خبره، دا کړۍ د پاکستان پوځي رژیم ته لارې پرانیزي، تر څو د پښتنو پر سیمو او ولسي خلکو بریدونه وکړي.
د پښتون ژغورنې غورځنګ د مرکزي شورا غړی زبیر شاه اغا وايي: « دلته میډیا، سیاستوال او فعالان د پاکستان جابر پوځ خوشاله ساتلو لپاره د پښتون قوم پر وژلو او ځورولو غلي دي.»
د چارو څارونکي وایي، د پاکستان پوځ له کلونو راهیسې هڅه کوي چې په خیبرپښتونخوا کې د پښتنو پر وړاندې غیرانساني او د نړیوالو قوانینو خلاف سیاستونه عملي کړي.
دوی وايي، هلته هره ورځ پښتانه زلميان نادرکه کېږي، خو یو شمېر ګوندونه او سیاسي فعالان یې پر وړاندې چوپ دي.
د سیاسي چارو شنونکی شهسوار سنګروال وايي: « کله چې امریکا پر افغانستان نظامي برید وکړ، پاکستان له دې موقع ښه ګټه پورته کړه او امریکا ته یې دا وویل چې ترهګر په دې ازادو قبایلو کې دي. د پاکستان هدف دا و چې له یوې خوا به قبایل ختم کړي او له بلې خوا به په میلیونونو ډالر ترلاسه کړي. دوی همداسې وکړل.»
په ورته مهال، د خیبرپښتونخوا اعلی وزیر هم یو ځل بیا د پاکستاني پوځ پر روانو عملیاتو سختې نیوکې کړې او تور یې لګولی چې پوځ د ترهګرۍ په نوم ولسي خلک په نښه کوي.
سهیل افریدي ویلي، په تیرا کې د پوځ په وروستیو عملیاتو کې وژل شوي ۲۱ کسان ټول ولسي وګړي وو او په هغوی کې یو هم وسله وال نه و.
د خیبرپښتونخوا اعلی وزیر سهیل افریدي دغه راز ویلي: « د پاکستان پوځ د ترهګرۍ تر عنوان لاندې زموږ له خلکو وینې څښي. دا ښکاره بدمعاشي او له بشري حقونو سرغړونه ده.»
دا څرګندونې وروسته له هغې کېږي چې له تېرو څو میاشتو راهیسې د پاکستان پوځي رژیم په خیبرپښتونخوا کې د ولسي خلکو پر کورونو، جوماتونو او ښوونځیو د ترهګرۍ په نامه پوځي عملیات پیل کړي چې هره ورځ په کې ولسي خلک قربانۍ ورکوي.
هلته په سیمه کې ځایي رسنۍ، خبریالان او سیاسي فعالان بیا د پاکستان پوځي رژیم په کړنو چوپ پاتې کېدل غوره ګڼلي او سترګې یی پرې پټي کړي دي.
