منډول ولسوالي چې کرنیزې ځمکې يې تر ډېره غرنۍ او له روانو اوبو لوړې پرتې دي، د کال په ځینو فصلونو کې د اوبو له نه شتوالي سره مخ وې، خو تازه د یادې ستونزې د حل لپاره ورته ویالې او کانالونه جوړ شوي.
د دې ولایت چارواکي واي، د یونپس ادارې په مالي ملاتړ د ډاکار موسسې له لوري د ۱۸ میلیونه افغانیو په لګښت ۱۱ کانالونه جوړو او ګټه اخیستنې ته سپارل شوي.
دغه کانالونه د یادې ولسوالۍ په ګډوال، چطور، پړوس، پاين ګډوال، کوراج او نورو سيمو کې رغول شوي دي.
نورستان والي زين العابدين عابد وايي: « له نېکه مرغه مو نن د یوولسو کانالونو پرانستنه وکړه. په دغو کانالونو ۱۸ میلیونه افغانۍ لګښت راغلی. د دغو کانالونو په جوړېدو سره د منډول ولسوالۍ لپاره لوی کار وشو؛ زه ولسونو ته ډاډ ورکوم چې نږدې ورځو کې به نورې پروژې هم پیل شي.»
د نورستان کليو بیا رغونې او پراختيا ریيس محمد ظاهر زرکمر وايي: « په دې پروژه کې ۱۰ کیلو مټره استنادي دېوالونه او ۳۲ کیلو مټره کانالونه په ښه کیفیت جوړ شوي. له ولس څخه مو هیله ده چې د دې ګران بیه پروژو ساتنه وکړي.»
