د هند لومړي وزیر خبرداری ورکړی چې په نوي ډیلي کې د چاودنې عاملان به حتمن نیسي او هېڅکله به د بښلو فرصت ورنه کړي.
نريندرا مودي چې دا مهال د دوو ورځو لپاره په بوتان کې دی، له چاودنې وروسته یې په خپل غبرګون کې ویلي، په نوي ډيلي کې د دې چاودنې عاملان به و نه بښل شي.
مودي په هندي ژبه خبرې کولې، خو د خبرداري پرمهال یې د ګواښ ټکي په انګلیسي ژبه هم تکرار کړل او ویې ویل چې ټول ښکېل کسان به عدالت ته راکاږي.
د هند لومړي وزیر نریندرا مودي زیاته کړې: « موږ ټول د ډیلي پېښې سخت دردولي یو او د هند ټول وګړي د هغو کسانو تر شا کلک ولاړ دي چې په دې پېښه کې يې زیان ليدلی. تېر ماښام مې د پېښې د څېړنې لپاره له ټولو ادارو سره اړيکه ونیوه. زموږ ادارې به د دې چاودنې ترشا پټ حقیقت معلوم کړي او په پېښه کې ښکېل کسان به عدالت ته راکاږي.»
د هند په پلازمېنه نوي ډيلي کې تاریخي لال قلعې ته څېرمه د دوشنبې په ورځ په یوه موټر کې د چاودنې له کبله د نوی ډيلي د پوليسو په خبره، لږترلږه ۸ تنه ژول شوي او ۲۰ تنه نور ژوبل شوي دي.
د نوي ډیلي پولیس زیاتوي: « چاودنه په يوه ورو روان موټر کې شوې چې سپرلۍ په کې وې. د چاودنې له کبله نورو موټرو هم اور اخیستی.»
د چاودنې له امله په نوي ډيلي، ممبی او ګاونډ ایالتونو کې امنيتي ځواکونو ته د تیارسئ امر شوی.
د چارو څارونکي بیا دې چاودنې ته په اشارې وایي، دا ډول بریدونه په سیمه کې د سیاسي بېثباتۍ یوه هڅه ده چې له کلونو راهیسې روانه ده.
د نړیوالو چارو شنونکی مجتبی کوهکن وايي: « دا برید ممکن داسې نورې زاویې هم ولري چې په کې د پاکستان لاس او رول وي. ښايي دا پر نوي ډیلي د فشار راوړلو لپاره یو پیغام وي.»
د هند په نوي ډیلي کې چاودنې ته په نړیواله کچه هم پراخ غبرګونونه ښودل شوي.
اسلامي امارت هم په نوي ډیلي کې پر چاودنې خواشیني ښودلې او د هند حکومت او له خلکو سره یې خپله خواخوږي څرګنده کړې ده. د بهرنیو چارو وزارت په خبرپاڼه کې د خواخوږۍ ترڅنګ، ټپیانو ته د بېړنۍ روغتیا غوښتنه هم شوې.
د امریکا بهرنیوچارو وزارت بیا ویلي، د هند په پلازمېنه نوې ډیلي کې تر چاودنې وروسته وضعیت څاري. دې وزارت د قربانیانو له کورنیو سره خواخوږي څرګنده کړې او د ټپیانو د بېړنۍ روغتیا هیله یې ښودلې.
د نړیوالو چارو شنونکی واحد فقیري وايي: « موږ باید انتظار وباسو چې څه پېښېږي او د دې برید ریښه چېرته ځي. آیا دا یو ترهګریز برید و که نه او آیا دا برید په کشمیر پورې اړه لري که نه؟ زه فکر کوم په دې اړه له وخت وړاندې قضاوت کول سم کار نه دی.»
د ۱۷مې پېړۍ سره کلا یا (لعل قلعه) د نوي ډيلي په زړه او ګڼمېشته سیمه کې پرته ده او هره ورځ زرګونه سیلانیان د دې تاریخي کلا لیدو ته ورځي.
له دې سره هممهاله، د پاکستان په پلازمینه اسلاماباد کې هم چادونه شوې چې له امله ۱۲ تنه وژل شوي او ۲۱ نور ټپیان دي. پاکستاني رسنیو راپور ورکړی چئ چاودنه د یوې محکمې مخې ته شوې.
