له ترکمنستان سره پر ګډه پوله پروت د هرات ولایت د تورغونډۍ بندر د پراختیا عملي چارې پیل شوې.
د ټولګټو وزارت مسوولان وایي، دغه پروژه به د ترکمنستان هېواد په مالي ملاتړ د ۷ میلیونه امریکايي ډالرو په لکښت نږدې په ۵۰ جرېبه ځمکه کې عملي شي او تمه ده چې په یوه کال کې یې چارې بشپړې او ګټه اخستنې ته وسپارل شي.
د ټولګټو وزارت د اوسپنې پټلۍ معین محمد اسحاق صاحب زاده وايي: « دوی به دلته د ۷ میلیونه ډالرو په ارزښت هنګرونه جوړوي. په دې سره به د سوداګرو لپاره په انتقالاتو کې اسانتیاوې جوړې شي. همدارنګه د توکو د وارداتو، صادراتو او خوندیتوب لپاره به هم سهولتونه رامنځته شي.»
د تورغونډۍ بندر په پراختیا، د هنګرونو او نورو اړینو تأسیساتو په جوړېدو سره به د صادراتو او وارداتو په کچه کې هم زیاتوالی راشي.
د هرات ځایي مسوولان وایي، د تورغونډۍ بندر له پراختیا سربېره، په دې ولایت کې د لسګونه نورو پراختیایي پروژو چارې هم رواني دي چې په بشپړېدو سره به یې هېواد کې اقتصادي پرمختګ رامنځته شي.
هرات والي شیخ نور احمد اسلام جار وايي: « د توکو د تخلیې او بارولو لپاره مو په ۵۰ جرېبه ځمکه کې د ځای جوړولو پرانستنه وکړه چې د یوه کال په موده کې به یې چارې بشپړې شي. همدارنګه د هرات – تورغونډۍ د رېل کرښې غځولو په اړه هم جدي خبرې روانې دي. د دغو پروژو په بشپړېدو سره به د هرات، لوېدیځ زون او ټول افغانستان په سوداګرۍ، ټرانزیټ او اقتصاد کې لوی انقلاب رامنځته شي.»
بله خوا، سوداګرهم په ټاکلي وخت د سوداګریزو توکو لېږد رالېږد او چارو ته یې د رسېدنې په موخه د تورغونډۍ بندر پراختیا او هرات- تورغونډۍ ترمنځ د اوسپنې پټلۍ غځولو هرکلی کوي او زیاتوي چې له دې سره به سوداګریز فعالیتونه لا چټک شي.
سوداګر توریالی غوثي وايي: « دا کار د قېمت، وخت او مصونیت له پلوه زموږ د سوداګرو او هېواد په ګټه دی. موږ به وکولی شو چې په دې سره د خپلو صادراتو لکه وچې مېوې او قېمتي ډبرو د صادرولو کچه لوړه کړو.»
موټر چلوونکی غلام محمد وايي: « فساد له منځه تللی، له دې وړاندې به ځینې موټر بې له نوبت څخه بارېدل، خو اوس هېڅ یو موټر بې نوبته نه بارېږي. د اوس لپاره څه ستونزه نه لرو.»
د یادونې وړ ده چې تورغونډۍ بندر کې د اسلامي امارت او د ترکمنستان د پلاوي ترمنځ ګډه ناسته کې د تورغونډۍ – هرات د اورګاډي پټلۍ د جوړېدو او له همدې لارې د سوداګریزې راکړه ورکړې پر زیاتېدو هم خبرې وشوې.
