د خوست تڼیو ولسوالۍ کې د کرومایټ ډبرو د پروسېس یادې فابریکې له پرانیستې سره هم مهاله، محلي چارواکي وايي دا فابريکه به په ۲۴ ساعتونو کې د سل ټنو کرومايټ ډبرو پروسېس ظرفيت ولري.
د مسوولانو په خبره، د کانونو او پټرولیم وزارت په پلان کې لري چې په نږدې راتلونکي کې به په دې ولایت کې د کانونو د اساسي سروې لپاره کار ترسره کړي.
د خوست کانونو او پټرولیم رییس صادق جان حمزه وايي: « موږ له دې پرته په ګربزو کې درې او ځاځي میدان کې دوه د کرومایټو قراردادونه نور هم لرو. د وزارت مقام په پلان کې لري چې د سروې لپاره یو مجهز ټیم را ولېږي او په اکثریت ولسوالیو کې شته معدنونه له سروې وروسته په قرارداد ورکړل شي.»
یاده فابریکه چې شاوخوا د ۲۰۰ زره امریکایي ډالرو په لګښت پانګونه پرې شوې، مسوولان یې وايي، د کرومایټ او نورو قېمتي ډبرو اکثریت خام مواد ګاونډي هېوادونه هلته له پروسېس وروسته په خپلو نومونو نورو هېوادونو ته صادروي؛ خو دوی زیاتوي چې که داخلي پانګوال په خپل هېواد کې د ورته پانګونې له لارې کار وکړي، تر ډېره به یاده ستونزه هواره شي.
د یلومون ګروپ رییس حلیم فرمولي وايي: « پانګونه په دې مانا ده چې وده له کلي او ولسوالۍ څخه پيل کېږي او ښار ته راځي. دا یو ښه فرصت دی چې امنیت تأمین دی او موږ کولی شو شپه او ورځ کار وکړو.»
د شرق نفرایټ استخراجي شرکت معاون عبدالطیف واحدي وايي: « دلته یوه داسې فابریکه فعالیت پيلوي چې د پروسېس چارې به پرمخ وړي. له دې وړاندې د پروسېس دا ډول کارخانې نه وې او زموږ خام مواد به په ګاونډیو هېوادونو کې پروسېس کېدل او د هغوی په نوم به نورو هېوادونو ته صادرېدل.»
اخوا د خوست تڼیو ولسوالۍ اوسېدونکي له حکومت غوښتنه کوي چې د کاني سیمو اوسېدونکو ستونزو ته ځانګړې پاملرنه وکړي.
د دوی په خبره، د یادو سیمو اوسېدونکي له ګڼو اساسي اسانتیاوو بې برخې دي. نو اړینه ده چې د ورته تړونونو پرمهال د خلکو اړتیاوو ته هم رسېدنه وشي؛ ترڅو د ژوند له بنسټیزو خدمتونو برخمن شي.
د تڼیو ولسوالۍ اوسېدونکی رفېع الله وايي: « خلکو ته باید د کار زمینه برابره شي. له دولت غوښتنه کوو چې دا نور کانونه هم استخراج کړي، ترڅو خلک په کار شي.»
د تڼیو یو بل اوسېدونکی جمعه دار وايي: « له موږ سره پخوا ډېر قولونه شوي وو، خو بیا هغه څه ونه شول. موږ ته تر اوسه د پام وړ کارونه نه دي شوي.»
خوست کې د کرومایټ ډبرو د پروسېس او استخراج سره هم مهاله ځایي چارواکي ډاډ ورکوي چې په سیمه ییزه کچه به د کاني سیمو مېشتو خلکو ته په اساسي برخو کې رسېدنه کوي.
