د جوزجان طوطي میدان ګازي ساحې استخراج چارې د لوړ پوړو چارواکو په حضور کې پیل شوې.
د ریاست الوزرا اقتصادي مرستیال ملا عبدالغني برادر اخوند دغه مراسموکې د خبرو پرمهال د طوطي میدان ګازي زېرمو پرانسته د هېواد اقتصادي پرمختیا کې مهم ګام وباله او زیاته یې کړه چې دا پروژه به د کورنیو اړتیاوو پر پوره کولو سربېره، صادراتو ته هم زمینه برابره کړي.
د ریاست الوزرا اقتصادي مرستیال ملا عبدالغني برادر اخوند وايي: « د دې مهمې پانګونې له امله به ډېرو هېوادوالو ته په مستقیمه او غیر مستقیمه توګه د کار زمینه برابره شي، په کور دننه به د ګازو داخلي تقاضا ته ځواب ووایي، پر وارداتي ګازو او برېښنا به د هېواد تکیه راکمه کړي، د اسعارو د خروج مخه به ونیول شي او په تدریجي توګه به بهر ته هم د ګازو صادرولو زمینه مساعده شي.»
د دې ګازي زېرمو استخراج قراداد یو کال وړاندې د کانونو او پټرولیم وزارت له خوا له یوه خصوصي شرکت سره لاسلیک شوی و.
دا ګازي زېرمې چې چارواکې یې د هېواد اقتصادي ځان بسیاینې لپاره مهمې بولي، چارواکي د قراردادي شرکت له مسولینو غواړي چې استخراج یې په مسلکي او معیاري ډول ترسره کړي.
د کانونو او پټرولیم وزیر ملا هدایت الله بدري وايي: « د جوزجان ولایت د طوطي میدان د ګازو بلاک چې شاوخوا ۷ زره ۵۰۰ کیلومټره مساحت لري، په کې۵۰ ساختماني جوړښتونه تثبیت شوي او شاوخوا ۳۰ ژورڅاه ګانې په کې شته دي.»
د قراردادي شرکت مشاور محمد ګل خلمي وايي: « د اکتشاف په لومړي پړاو کې چې ۳ کاله به ادامه ولري، له ۴۵۰۰ کیلومټره مربع څخه ډېره ساحه به سروې کړو او ۲ کړۍ نوي څاه ګان به هم وکیندو.»
په همدې حال کې ازبېکستاني لوری افغانستان سره د اړیکو د پياوړتیا ډاډ ورکوي.
د افغانستان لپاره د ازبېکستان د ولسمشر ځانګړی استازی عصمت الله ایرګاشیف وايي: « هغه ټولې پروژې چې په دې موده کې لاسلیک شوې دي، څرګندوي چې د افغانستان حکومت له خپلو کاني زېرمو څخه په سمه توګه ګټه اخلي. موږ د یوه ښه ګاونډي هېواد په توګه چمتو یو چې له خپلو افغان وروڼو څخه ملاتړ وکړو.»
د بلخ ځايي چارواکي هم په هېواد کې د پانګونې لپاره د زمینې پر برابرېدو خوښ دي او د یادې برخې د پياوړتیا هیله يې ښودلې.
د بلخ والي محمد یوسف وفا وايي: « په ټولو سوداګرو او پانګوالو غږ کوو چې خپل وطن ته راشي، موږ به دلته د خدمت هر ډول زمینه ورته برابره کړو. موږ دا ژمنه کړې وه چې اشغال به ختم او شرعي نظام راولو او له هغه وروسته به د خپل ولس خدمت کوو. دا زموږ اسلامي وجیبه ده چې د خپلو خلکو خدمتو وکړو.»
د یادونې وړ ده چې آمو دریا نفتي حوزه په سرپل او جوزجان ولایتونو کې د نفتي موادو پراخې زیرمې لري چې دا مهال ترې نفت استخراجیږي.
د کانونو او پټرولیم وزارت د معلوماتو له مخې، دا مهال د آمو دریا په قشقري، انګوت او حق دریا سیمو کې د نفتي موادو٢٥ څاګانې فعاله دي چې هره ورځ ترې شاوخوا ١٣٥٠ ټنه نفت استخراجېږي.
