له ګاونډیو هېوادونو او په تېره له ایرانه د کډوالو د ستنېدو له زیاتېدو سره هم مهاله، په هرات کې د استوګنیزو کورونو د جوړولو بهیرهم مخ پر چټکېدو دی.
د دې ولایت سیمه ییز چارواکي وايي، د کډوالو په راستنېدو سره ګڼه ګوڼه او د ودانیو جوړولو لړۍ زیاته شوې ده چې له امله يې د ښار د ځینو ناحیو ساحې پراخې کړې دي او د دوو نویو ناحیو د جوړېدو طرحه هم تصویب شوې ده.
د هرات کور او ښار جوړونې رییس عبدالله اکبري وايي: « د ښارونو پراختیا د ماسټر پلان او نورو ښاري پلانونو جوړولو ته اړتیا لري. په تېرو دوو اوونیو کې د هرات ښار لپاره د دوو نویو ۱۶ او ۱۷ ناحیو د جوړېدو امر ترلاسه کړی چې یوه به یې ۹ کیلومټره او بله به یې ۱۸ کیلومټره مربع مساحت ولري.»
د هرات د ښاروالۍ ویاند محمد ناصر ارمل وايي: « له ایران او نورو ګاونډیو هېوادونو څخه چې کوم کډوال راستانه شوي، ورسره هرات ښار کې ګڼه ګوڼه زیاته شوې او له امله یې د نویو ودانیو جوړولو کار خورا زور اخیستی. د هرات ښار ټولې ناحیې د پلان له مخې جوړې شوې او اوسمهال نوې ودانۍ که هغه استوګنیزې دي یا تجارتي، د پلان له مخې جوړېږي.»
هرات کې د ودانیو جوړولو له ډېرېدو سره د یو شمېر ساختماني توکو د کاروباریانو کارونو هم وده کړې.
دې برخه کې تازه راستنو شویو هم پانګونه پيل کړې او د نورو بې رزوګاروو کسانو لپاره یې هم د کار زمینه برابره کړې ده.
د ساختماني بلوکو جوړولو کارخونې خاوند فریدون وايي: « دا کار مې ایران کې زده کړی او هلته مې څو کاله کار کړی. کله چې له ایران را واړول شوم، په دې کارخونه مې پانګونه وکړه. تقریبا ً ۳.۵ تر ۴ سوه زرو افغانیو مې پانګونه کړې.»
د ساختماني بلوکو جوړونکی محمد صادق وايي: « ما شپږ کاله په ایران کې د ساختمان او ولډینګ کارۍ کار کړی. کله چې شپږ میاشتې وړاندې را واړول شوم، بېرته مې خپل پخواني کار ته مخه کړه. اوس مې خپله کورنۍ هم راغوښتې ده او ټول هرات ښار کې اوسېږو.»
بله خوا، یو شمېر کسان چې د کډوالو له خوا ورته د کار زمینه برابره شوې، خوښ دي او په بېلا بېلو برخو کې د لا ډېرو کاري فرصتونو غوښتنه کوي.
کارګر شعارالله وايي: « زه له بادغیس ولایت څخه دلته د کار لپاره راغلی یم، د خدای فضل دی اوس کار لرم. زه ایران کې له پرتو مهاجرینو غواړم چې راشي پانګونه وکړي، ترڅو هم خپله او هم نور ورسره په کار شي.»
کارګر شمس الدین وايي: « د خدای شکر دی خپل هېواد کې کار پیدا کېږي، له بل هېواد مې هېڅ ګټه نه ده لیدلې. له نورو هم غوښتنه کوم که پیسې لري، راشي دلته پانګونه وکړي او نورو خلکو ته هم د کار زمینه برابره کړي.»
دا په داسي حال کې ده چې څو ورځې وړاندې د ملګرو ملتونو بشري استوګنې پروګرام د هرات ښار چټکې پراختیا او بڼې بدلېدو په اړه اندېښنه ښودلې او خبرداری ورکړی چې له پلان جوړونې پرته دا چټکه پراختیا د نفوس د زیاتوالي، ناخوندي کورونو او د خدمتونو د کمښت لامل کېدای شي.
