تورخم د افغانستان، پاکستان، منځنۍ اسیا او یو شمېر نورو هېوادونو ترمنځ د ټرانزیټي ګڼه ګوڼې له مخې مهم بندر بلل کېږي.
دلته د افغانستان پر تازه مېوو او خوراکي توکو سلګونه بار موټر درول شوي دي. موټر چلوونکي وایي، دا کار پاکستاني پولیسو کړی او له څو ورځو راهیسې دوی ته اجازه نه ورکوي چې له کرښې هاخوا تېر شي.
موټر چلوونکی هارون وايي: « دا دواړه هېوادونه دومره سره سخت دي چې موږ ته هېڅ ډول اسانتیا نه شته. په دې موټرو کې رومیان او مېوې بار دي، که دوې ورځې نور ودرېږي، ټول به خراب شي. په داسې حال کې چې د ډبرو سکرو موټرو ته اجازه ورکوي.»
موټر چلوونکی عبد الباسط وايي: « دوې ورځې کېږي چې دلته ولاړ یو. په دې موټرو کې سبزۍ او انګور بار دی او خرابېږي. هرکال په دې وخت کې ستونزې جوړېږي او سوداګرو ته زیانونه رسي.»
موټر چلوونکي وایي، پاکستان د خپلو سیاسي موخو د تعقیب لپاره وخت ناوخت د بېلابېلو پلمو له مخې دا لاره تړي. د دوی په خبره، که د سرپرست حکومت چارواکي یې غږ وانه وري او له پاکستاني اړخ سره په دې اړه خبرې ونه کړي؛ ممکن نږدې ورځو کې مېوې خرابې او میلیونونه افغانۍ زیان ور واوړي.
موټر چلوونکی الماس وايي: « نن مې دویمه ورځ ده چې دلته ولاړ یم، هرکال همدا لانجې دي، کله چې رومیانو او انګورو سېزن شي، لاره بنده شي. مال لرونکي هرکال غټ تاوانونه کوي، ځکه تورخم کې ګرمي ده او دا مال خرابېږي.»
موټر چلوونکی نبي وايي: « په موټرو کې سبزۍ بار دي، لاره یې بنده کړې او ټول خراب شول. موږ غوښتنه دا ده چې یا دې په تورخم کې سم کانکرېټي دېوال ووهي او یا دې دا لاره خلاصه کړي.»
هڅه مو وکړه د سوداګرو او موټر چلوونکو د یادو ستونزو او شکایت په اړه د صنعت او سوداګرۍ وزارت او سوداګرۍ او پانګونې خونې چارواکو نظر له ځان سره ولرو؛ خو زموږ پرله پسې اړیکو ته یې ځواب رانه کړ.
موټر چلوونکي داسې مهال تورخم بندر کې د پاکستاني پولیسو له لوري د درول کېدو شکایت کوي چې د راپورونو په اساس، تېر کال د افغانستان او پاکستان ترمنځ د دې بندر له لارې شاوخوا ۱.۶ میلیارد ډالرو په ارزښت صادرات او واردات شوي وو.
