ځينو پاکستاني رسنيو د پاکستان- چين د سوداګرۍ او صنايعو خونې سرپرست له قوله ويلي، د چين او پاکستان ګډ اقتصادي دهلېز د افغانستان لپاره د ټرانزيټي او اقتصادي فرصتونو د رامنځته کولو په حال کې دی.
ظفر اقبال دغه دهلېز پر ټرانزيټي مسير د افغانستان بدلوونکی ياد کړی او په خبره يې، له دې لارې افغانستان منځنۍ، ختيځې او سوېلي آسيا سره نښلولی شي.
د پاکستان- چين د سوداګرۍ او صنايعو خونې سرپرست دا هم ويلي، افغانستان له دې وروسته په وچه کې د ګېر هېواد په توګه محدود نه دی؛ ځکه د نوموړي په خبره د منځنۍ آسيا هېووادونو د سيپېک پروژې پر اساس د افغانستان له لارې د پاکستان ګوادر بندر ته د لاسرسي کلکه لېوالتيا لري.
اقبال په دې اړه ویلي: « دې ته په کتو چې اوزبېکستان، تاجیکستان او د منځنۍ آسيا نور هېوادونه له ګوادر بندر د ګټنې هڅه کوي.، افغانستان هم کولی شي له سوداګرۍ، ټرانزیټ، سيمه ييز پيوستون او پر زېربناوو د پانګونې له لارې د پام وړ ګټه وکړي.»
په ورته مهال د اقتصادي چارو شنونکي هم د اقتصادي اړيکو، سوداګرۍ او ټرانزیټ په پراختيا، د زيربنايي پروژو په پياوړتيا، د برېښنا شبکې په وصل او په هېواد کې د کاري فرصتونو په ایجاد کې د چين او پاکستان اقتصادي دهلېز پروژې رول مهم يادوي.
د اقتصادي چارو شنونکی عبدالنصیر رشتیا وايي: « دا پروژه ښايي افغانستان ته ګټه ورسوي، ځکه چې افغانستان په وچې پورې تړلی هېواد دی او موږ تل د نړیوال تجارت په برخه کې له ستونزو سره مخ یو. کله چې موږ له دې پروژې سره یوځای کېږو، بې له شکه افغانستان له اقتصادي انزوا وځي، ډېرو خلکو ته د کار زمینه برابرېږي، د ټرانزیټ حق اخیستلو له درکه زموږ د عوایدو کچه لوړېږي او زما په اند، له دې ټولو مهمه دا ده چې افغانستان کولی شي خپل جیوپولوټیک رول اداء کړي او د سیمې د هېوادونو ترمنځ نښلوونکي پل جوړ شي.»
ځينې نور شنونکي د سيپېک پروژه سمندري بنادرو په ځانګړې توګه ګوادر بندر ته د افغانستان لاسرسي لپاره مهمه ګڼي او زياتوي چې په دې توګه افغانستان له نورو هېوادونو سره خپله سوداګري زياتولی شي.
د اقتصادي چارو شنونکی عبدالجبار ساپی وايي: « لکه څرنګه چې پاکستان غواړي افغانستان هم په سیپېک پروژه کې شامل کړي یا د ګوادر بندر له لارې افغانستان او سوداګرو ته ښه سهولتونه ورکړي، دا د افغانستان لپاره ډېره مهمه او په ګټه ده. دا پروژه کولی شي له نړۍ سره د افغانسان نښلولو او اقتصادي پياوړتیا کې او دغه راز د صادراتو او وارداتو په برخه کې او ټرانزیټ کې مهم رول لوبوي.»
د چين- پاکستان اقتصادي دهلېز يا سيپېک د دواړو هېوادونو ترمنځ لويه اقتصادي پروژه ده چې په اړه يې د کابل په کوربه توب د پاکستان، افغانستان او چين چارواکو ترمنځ په درې اړخيزه ناسته کې هم خبرې شوې.
