پکتیا کې د صنعت او سوداګرۍ ریاست په همکارۍ د یوه خصوصي شرکت له لوري د تور الماس په نوم د کورنیو تولیدي توکو لپاره د نندارې او بازار موندنې په موخه د یاد درې ورځني نندارتون پرمهال ځایي چارواکي وایي، د نندارتون له جوړېدو یې موخه کورنیو توليداتو ته بازار موندنه او په افغاني توکو د خلکو باور زیاتول دي.
د پکتیا صنعت او سوداګرۍ رییس عظیم الله وايي:« په مجموع کې د ټول هېواد پر سطحه په دې موضوع ډېر کارونه روان دي او د اسلامي امارت د صنعت او تجارت وزارت په دې اړه ښه پرمختګونه لري، لیدنې ترسره کوي، هېوادونو ته سفرونه کوي او بازار موندنه کوي.»
د نندارتون جوړوونکی مسعود حقمل وايي:« دا نندارتون د صنعت او سوداګرۍ وزارت په همکارۍ د درېیو ورځو لپاره د پکتیا ولایت مرکز ګردېز ښار کې د افغان تولیداتو او محصولاتو د ودې او بازار موندنې لپاره په لاره اچول شوی دی.»
اخوا په دې جوړ شوي درې ورځني نندارتون کې ځینې سوداګر او پانګه وال که څه هم دا ډول نندارتونونه د داخلي توکو بازار موندنې لپاره خورا ګټور ګڼي، ترڅنګ یې له اړوند بنسټونو او ادارو غوښتنه کوي چې د داخلي توکو لپاره بايد په بهرنیو هېوادونو کې هم بازار پيدا او د لېږد په برخه کې يې اړينه مرسته وکړي.
سوداګر شریف الله وايي:« شکر دی ستونزه نه لرو، خو غوښتنه کوو چې دا ډول نندارتونونه دې نور هم زیات شي، ترڅو هېوادوال له وطني تولیداتو خبر شي.»
سوداګر عبدالحی وايي:« موږ له دولت غوښتنه کوو چې دا پروګرامونه نړیوال کړي، دا کار هم زموږ پر ګټه دی او هم زموږ د محصولاتو. موږ حاضر یو له دې پروګرام ملاتړ وکړو.»
د هېواد له بېلابېلو ولايتونو په ۶۰ غرفو کې د توليدي توکو او کرنیزو محصولاتو له یاد نندارتون سره هم مهاله، ځایي چارواکي سوداګرو او صنعت کارانو ته ډاډ ورکوي چې په پکتیا کې د صنعتي پارک ځمکو د وېش په برخه کې دې له دوی سره خپل غوښتنلیکونه شریک کړي، ترڅو د کارخونو لپاره ورته ځمکې په واک کې ورکړل شي.
