د ټاپي پروژې دوو مهمو شریکانو پاکستان او ترکمنستان د دې پروژې د چارو پر بشپړېدو ټینګار کړی او زیاته کړې یې ده چې دغه ډول پروژې به په ټوله سیمه کې باور جوړونې او اړیکو ته لار هواره کړي.
په پاکستان کې د ترکمنستان سفیر اتا جان موولاموف او د پاکستان د مالیې او عوایدو وزیر محمد اورنګزېب په ګډه ټینګار کړی چې باید د ټاپي پروژې چارې بشپړې شي.
په اسلام اباد کې د ترکمنستان سفارت وايي: « دواړو لوریو د ټاپي پروژې پر چارو بحث او خبرې وکړې. هیله یې څرګنده کړه چې ژر تر ژره د دې پروژې چارې بشپړې شي، دا ځکه چې دا ډول پروژې د اوږدمهاله ټولنیز او اقتصادي پرمختګ لپاره اساس او په ټوله سیمه کې باوري اړیکو ته لار جوړوي.»
سرپرست حکومت بیا له خپل پلوه د ټاپي پروژې د چارو په تړاو ډاډ ورکوي او زیاتوي چې په افغان خاوره کې د دې پروژې نل لیکه تر۱۴ کیلومټره غځېدلې او ۶۰ کیلو مټره د نل لیکې دغځېدو لپاره چارې بشپړې شوې دي.
د بهرنیو چارو وزارت د اقتصادي چارو رییس شفیع اعظم وايي: « د ټاپي عملي کار چې له کلنو راهیسې یو خیال ګڼل کېده، اوس یې په افغانستان کې ۱۴ کیلومټره پایپ لین غځېدلی او د ۶۰ کیلومټرو نور پایپ لین لپاره هوار کاري بشپړه شوې ده.»
له اقتصادي پلوه ټاپي پروژه د افغانستان لپاره ګټوره یادېږي.
د کارپوهان په وینا، د دې پروژې په بشپړېدو سره به افغانستان هرکال میلیونونه ډالره عواید ترلاسه کړي او دا پروژه به په افغانستان کې نورو سترو پانګونو ته هم زمینه برابره کړي.
د اقتصادي چارو شنونکی نورالله عزیز وايي: « دا پروژه د افغانستان لپاره ستر اقتصادي ارزښت لري؛ ځکه افغانستان به نه یوازې له دې لارې انرژي ترلاسه کړي بلکې هر کال به د ټرانزیټ قیمت هم ترلاسه کوي. همدارنګه ډېری افغان او بهرني مسلکي کارګران به په افغانستان کې پر کار بوخت شي او د هغوی د عوایدو تګ راتګ به د افغانستان د اقتصادي ارزښت لپاره ډېر مهم وي. کله چې ټاپي پروژه پلې شي، دا به نورو لویو پانګونو ته هم زمینه مساعده کړي.»
د کارپوهانو باور بیا دا دی چې ټاپي پروژه له سیاسي پلوه هم د افغانستان پر ګټه ده. دا ستره اقتصادي پروژه د متخاسمو هېوادودنو اقتصادي ګټې سره غوټه کوي چې له دې سره به د افغانستان سیاسي ثبات ته ورسیږي.
د اقتصادي چارو شنونکی صمیم جاهد وايي: « دا ډېره مهمه پروژه ده او هرکال افغانستان ته په مستقیمه او غیر مستقیمه توګه میلیونونه ډالر عواید په لاس ورکوي. دا پروژه به افغانانو ته د کار زمینه برابره کړي او د زېربناوو په پراختیا کې به مهم رول ولري. له سیاسي پلوه ویلی شو چې دا پروژه یو ثبات راوړونکی فکټور دی؛ ځکه دا پروژه څو متخاصم هېوادونه لکه هند او پاکستان سره نښلوي او دې ته به یې وهڅوي چې اقتصادي همکارۍ ډېرې کړي. دا هرڅه به د افغانستان پر اقتصاد ښه اغېز ولري.»
د ټاپي پروژې کارونه د ۲۰۱۵ کال په ډسمبر کې پیل شوه چې په سیمه ییزه کچه یوه لویه او مهمه پروژه ده او په وسيله يې د ترکمنستان طبيعي ګاز د افغانستان لارې پاکستان او هندوستان ته لېږدول کېږي چې په کلنۍ توګه د ۳۳ میلیارد متر مکعب ګازو د لېږد وړتيا لري.
