هرات کې د صنعتي کارخونو د فعالېدو په لړ کې دا ځل د ۷ میلیونو ډالرو په ارزښت د فولادو وېلې کولو کارخونه پرانیستل شوه.
د دې کارخونې مسوولین وایي، په ورځني ډول شاوخوا۱۵۰ ټنه ګول سیخونو تولیدولو ظرفیت لري او څه باندې ۱۵۰ کسانو ته یې د کار زمینه برابره کړې.
د کارخونې رییس خان ګل اسحاقزی وايي: « اوس مهال موږ ۱۰۰ ټنه تولید لرو او غواړو چې دا تولید تر ۲۵۰ ټنو ورسوو. موږ ته اوس خامه اوسپنه له ایرانه راځي، خو له دې وروسته به کباړ اوسپنې هم وېلي کوو او تولید به لوړوو.»
بله خوا د هېواد اوسپنې وېلې کولو ټولنې مسوولین وایي، اوس مهال۵۰۰ میلیونو ډالرو په ارزښت د اوسپنې وېلي کولو ۴۳ کارخونې په کور دننه فعالیت لري چې له امله یې هېواد د اوسپنې وېلي کولو او ګول سیخ تولیدولو په برخه کې ځان بسیاینې ته رسېدلی.
د اوسپنې وېلې کولو ټولنې رییس عبدالنصیر رښتیا وايي: « غواړم ستاسو له لارې اعلان وکړم چې افغانستان د اوسپنیزو توکو د تولید له پلوه په مطلق ډول ځان بسیا شوی. موږ حاضر یو چې له هېواد د باندې هم صادرات ولرو. په دې سکټور کې له ۵۰۰ میلیونو ډالرو ډېره پانګونه شوې او تر ۲۰ زرو پورې ځوانان په کې په مستقیمه توګه او له ۳۰ زرو زیات په غیر مستقیمه توګه پر کار بوخت دي. »
د صنعتکارانو په خبره، که څه هم هېواد کې د امنیت ټینګښت او له کورني تولیداتو د سرپرست حکومت ملاتړ له امله پانګونې ته زمینه برابره شوې، خو د برېښنا او خامو موادو کمښت او له بهرنیو هېوادونو د ورته مشابه توکو واردات سبب شوي چې په کور دننه تولیداتو بهیر او بازار ټکنی شي.
صنعتکار ظریف خان اسحاقزی وايي: « تقریبا ً ۲۰ ورځې کېږي چې موږ په ۲۴ ساعتونو کې له ۸ تر ۱۰ ساعتونو برېښنا لرو چې له امله یې زموږ تولیدات دوه برخې کم شوي دي. زموږ ماشینونه په دوه یا درېیو ساعتونو کې ګرمېږي او کله چې تولید پيل کړو، نو برېښنا بېرته لاړه شي.»
صنعتکار نجیب الله وايي: « که چېرې پرله پسې برېښنا ولرو له ۱۲۰ تر ۱۵۰ ټنو تولید کولی شو؛ خو اوس مهال له ۵۰ تر ۶۰ ټنو تولید لرو، یانې نیمايي ته راښکته شوی دی.»
له دې ټولو سره، هرات کې ځایي مسوولین د کورنیو تولیداتو له ودې او صنعتکارانو د ملاتړ ډاډ ورکوي، خو ټینګار کوي چې صنعتکاران دې د کمیت پرځای کیفیت ته پاملرنه زیاته کړي.
هرات والي نور احمد اسلام جار وايي: « اسلامي امارت صنعتکار ته د یوه مجاهد په سترګه ګوري او سخت ملاتړ یې کوي. زه له محترمو صنعتکارانو غوښتنه کوم چې د خپلو تولیداتو کیفیت لوړ کړي، ځکه چې په دې اړه ماته ډېر زیات شکایتونه راځي.»
د مسوولینو د مالوماتو له مخې، هرات صنعتي ښارګوټي کې له یو زر۱۶۰ ډېرې کارخونې فعالیت لري.
