د افغانستان او ازبېکستان د خصوصي سکټورونو د ګډ پلاوي او استازو ترمنځ په سوداګریزه ناسته کې پر ګڼو سوداګریزو، اقتصادي، ټرانزیټي او ګمرکي مسایلو خبرې شوې.
د صنعت او سوداګرۍ وزارت سرپرست په تېر یوه کال کې د کابل او تاشکند ترمنځ د سوداګرۍ وده کمسارې بولي او وايي، د شویو دوه اړخیزو ژمنو پر بنسټ، ټاکل شوې د سوداګرۍ کچه په کلني ډول دوه میلیارد ډالرو ته لوړه شي.
نورالدین عزیزي زیاتوي، مقابل لوري منلې چې له افغانستان سره به په تجارتي، ټرانزیټي، ګمرکي او د پانګونې برخو کې اسانتیاوې رامنځته کوي. د عزیزي په خبره، له ازبېکستان سره د رېل ګاډي مسیر پر پراختیا هم بحثونه شوي.
د صنعت او سواګرۍ وزارت سرپرست دغه راز وايي، په پام کې ده چې له ازبېکستان سره په صادراتو او وارداتو کې بیلانس رامنځته شي او له مقابل لوری هم غواړي چې په افغانستان کې له لسو زیاتو سکټوري برخو کې پانګونه وکړي.
د صنعت او سوداګرۍ وزارت سرپرست نورالدین عزیزي زیاتوي: « د افغانستان او منځنۍ آسیا هېوادونو ترمنځ او په ځانګړې توګه د ازبېکستان له جمهوریت سره د افغانستان اقتصادي او سوداګریزې اړیکې لوړ حد ته رسېدلې او ښايي په تاریخ کې یې ساری نه وي لیدل شوی.»
بل پلو، په افغانستان کې د ازبېکستان شارژدافیر د پانګونې او سوداګرۍ په برخو کې له کابل سره د تاشکند د فعالې همکارۍ د پیل او دوام خبر ورکوي.
اوی بېک عثمانوف وایي، د دواړو خواوو د سوداګریزو استازو او هئیتونو د تګ راتګ له کبله د سواګرۍ کچه دا مهال له ۱.۲ میلیارد ډالرو اوښتې ده.
په افغانستان کې د ازبېکستان شارژدافیر اوی بېک عثمانوف ویلي: « موږ ډېر خوښ یو چې د روان کال په لومړۍ نیمايي یا شپږو میاشتو کې ازبېکستان ته د افغانستان صادرات ۳۰۰ سلنه زیات شوي دي.»
په ورته مهال، د افغانستان د سوداګرۍ او پانګونې خونه له ازبېکستان سره د سوداګرۍ د ودې په برخه کې د سیمه ییزې خونې، تجارتي زون او د سوداګریزو وېزو په برخه کې د اسانتیاوو پر رامنځته کېدو ټینګار کوي.
بله خوا، د ازبېکستان د پلاوي رییس له افغانستان سره د سوداګریزو او اقتصادي اړیکو پراختیا د دواړو هېوادونو په ګټه بولي او له کابل سره د تاشکند سوداګري د یو نیم برابر زیاتېدو خبر ورکوي.
د افغانستان د سوداګرۍ او پانګونې خونې رییس سید کریم هاشمي وايي: « په اوسنیو شرایطو کې یو شمېر محدودیتونه لکه د ازبېکستان هېواد له خوا د افغانستان خصوصي سکټور ته د تجارتي وېزو نه صادرېدل سبب شوي چې سوداګریزې اړیکه هغسې پراخې نه شي لکه څومره چې ورته اړتیا ده. موږ له ازبېکستان سره د دغو اړیکو پراختیا غواړو.»
د ازبېکستان د پلاوي رییس بهادر تاشماتوف وايي: « لکه څنګه چې ښاغلي اوی بېک عثمانوف هم په خپلو خبرو کې ورته اشاره وکړه، د افغانستان او ازبېکستان ترمنځ سوداګریزه راکړه ورکړه د تېر کال په پرتله یو نیم برابر زیاته شوې ده.»
د دې ناسې په پایله کې د افغان او ازبېک خصوصي سکټورونو استازو ترمنځ د (بي ټو بي) ناستې له لارې په بېلابېلو برخو کې د څه باندې ۲۰میلیون ډالرو په ارزښت د راکړې ورکړې تړونونه هم لاسلیک شول.
