د حکومتي ادارو د یو کلنو لاسته راوړنو تشرېح پروګرام په لړ کې د چهارشنبې پر ورځ د افغانستان بانک چارواکو د حکومت د رسنیو مرکز کې خپلې یو کلنې لاسته راوړنې تشرېح کړې.
د دې بانک لومړي مرستیال د امریکايي ډالرو پر وړاندې د افغانیو ثبات لپاره د متوازن او معقول سیاست تګلارې پلي کول مهم پرمختګ وباله او زیاته یې کړه چې د تېر یوه کال راهیسې د ډالرو پر وړاندې د افغانیو ارزښت د همدې تګلارې له مخې د ۰.۷۹ سلنې په پرمختګ سره خوندي ساتل شوی.
صدیق الله خالد د مرکزي بانک له خوا په سوداګریزو معاملاتو کې پر افغانیو پېر او پلور او په انفلانسیون کې د اړتیا وړ کچې احتکار مخنیوی د افغانیو د ثبات مهم لاملونه یاد کړل.
خالد په دې اړه وايي: « په ۱۴۴۶ هجري قمري کال کې د معقولو پولي سیاستونو د تطبیق په پایله کې د افغانستان بانک وتوانېده چې د افغانیو له ارزښت په ښه ډول ساتنه وکړي او د انفلاسیون کچه په مطلوب حد کې وساتي. د بازار د شرایطو د دقیق تحلیل، د اسعارو بازار د مناسب مدیریت، د پیسو د عرضې او تقاضا د تنظیم او د پولي او مالي سیاستونو د همغږۍ له امله د امریکايي ډالرو پر وړاندې د افغانیو ارزښت ۰.۷۹ سلنه مثبت تغییر درلود.»
د دې بانک لومړي مرستیال دغه راز وویل، تېر کال بازارنو ته له ۴۱ میلیاردو زیات د افغانیو نوي بانک نوټونه وېشل شوي او د همدې کال په لړ کې ۵ میلیارده زاړه بانک نوټونه راټول او له منځه وړل شوي دي.
د افغانستان بانک لومړی مرستیال په دې اړه وايي: « په تېر کال کې د مشتریانو د پیسو اخیستلو محدودیتونه هم راکم شوي. اوس خلک کولی شي په اوونۍ کې ۳۵۰ زره افغانۍ او په میاشت کې یو میلیون افغانۍ له خپلو حسابونو ترلاسه کړي. په ډالري حسابونو کې دا کچه په اوونۍ کې ۵ زرو ډالر او په میاشت کې ۱۵ زره ډالرو ته لوړه شوې ده. په ورته وخت کې د پیسو د نړیوال انتقال په برخه کې هم ډېرې اسانتیاوې رامنځته شوې دي. د پیسو د نړیوالې لېږدونې یا ټي.ټي د پروسې طی مراحل چې مخکې به د افغانستان بانک له لارې ترسره کېدل، اوس سوداګریزو بانکونو ته سپارل شوي دي.»
صدیق الله خالد د افغانستان بانک له لوري له بانکي حسابونو د زیاتو پیسو ترلاسه کولو لپاره د اسانتیاوو رامنځته کول او پر نړیواله کچه د سوداګرو لپاره د پیسو په انتقال کې د یو لړ محدودیتونو لرې کول هم د دې بانک له یو کلنو مهمو لاسته راوړونو وګڼل.
د خالد په خبره، د پیسو چټک انتقال او سوداګریزو معاملاتو لپاره شخصي بانکونه ته له ۲۰۰ نړیوالو بانکونو سره د سوداګریزو اړیکو او پیسو انتقال زمینې برابرې شوې دي.
د افغانستان بانک لومړی مرستیال زیاتوي: « همدارنګه په ۱۴۴۶ هجري قمري کال کې د افغانستان بانک له شپږو زونونو نږدې ۵ میلیارده مندرېس بانک نوټونه راټول او له ګردښت ایستلي دي. دا کار له بازار د مندرېسو بانک نوټو راټولونې او د پیسو جریان د منظم ساتلو لپاره ترسره شوی دی.»
د افغانستان بانک چارواکي د خپلو یو کلنو لاسته راوړنو د تشرېح پروګرام کې وايي، اوس مهال له ۳۸۸ میلیاردو زیاتې افغانۍ په سوداګریزو معاملاتو او آزاد بازار کې کارول کېږي او ۴۶ میلیارده افغانۍ د بسپنې په توکه خوندي شوې دي.
