د خصوصي او دولتي سکټور چارواکي په کابل کې راغونډ شوي، ترڅو د پانګوالو ستونزې واوري او حل لارې ورته ولټوي.
د خصوصې سکټور چارواکي وايي، پانګوال لاهم ګڼې ستونزې لري چې باید د حل لارې ورته پیدا او ولټول شي.
دوی زیاتوي، د برېښنا، ځمکې او د اوبو کمښت هغه ستونزې دي چې پانګوال ورسره لاس په ګرېوان دي او په خبره يې، سرپرست حکومت دې د يادو ستونزو په حلولو سره بهر ميشتي افغان سوداګر هم هېواد ته د راګرځېدو لپاره وهڅوي.
د سوداګرۍ او پانګونې خوني مرستیال محمد یونس مومند وايي: « د دغو ستونزو په منځ کې د برېښنا پرله پسې کمښت ستونزه یوه له مهمو ستونزو ده. خصوصي سکټور او په ځانګړې توګه د صنعت او تولید په برخه کې له دې ستونزې ځوریږي. د صنعتي پارکونو فابریکې اړې دي چې له غیر اقتصادي سرچینو لکه تېلو په لوړ لګښت کار واخلي.»
بله خوا چارواکي وايي، د کابل ښار د نظم او ښکلا لپاره هر کال ښاروالۍ ته ۵ میلیارد افغانۍ بودیجه ورکول کېږي او ښاروالي يې باید مصرف کړي.
د چارواکو ارزونې ښيي چې په اوس وخت کې د کابل لپاره ۵۰۰ مېګاواټه برېښنا ته اړتیا ده، خو ډاډ ورکوي چې په دې ولايت کې د عامو خلکو او صنعتي پارکونو د برېښنا پرچاوۍ ستونزو د هواري هڅې دوام لري.
د ریاست الوزرا اداري مرستیال ملا عبدالسلام حنفي وايي: « کابل ښاروالي باید هر کال پنځه میلیارده بودیجه د ښار د پرمختګ لپاره مصرف کړي، دا لږه بودیجه نه ده. د افغانستان اسلامي امارت د ښاروالیو له یوې افغانۍ عوایدو هم ګټه نه اخلي، بلکې د همدې ښارونو په ترقۍ او رغولو کې لګول کېږي.»
حنفي د کابل ښار د اوبو اړوند ستونزې په تړاو وايي، کابل ته د پنجشېر سيند د اوبو پر انتقالولو کار پيل شوی، خو په بېړنۍ توګه د ستونزې لپاره د کابل په ټولو ولسواليو کې چکډېمونه جوړېږي.
په ورته مهال، یو شمېر نور چارواکي وايي، د اسلامي امارت د رهبر په لارښوونه د پانګوالو ستونزو حل ته ځانګړې پاملرنه کېږي او په نږدې راتلونکې کې به پانګوالو ته په صنعتې پارکونو کې د نورو ځمکو د وېش لړۍ هم پیل شي.
د کابل والي امینالله عبید وايي: « د صنعت او تجارت په اړه باید ووایم چې کابل کې ځمکې مشخصې شوې دي ډېر ژر به انتقال شي او ټولو پانګوالو ته زېری ورکوو چې ستاسو ضروروتونه به په کې رفع کېږي.»
د کابل والي په خبره، د کابل صنعتي پارکونو کې د روغتیايي سکټور لپاره ۱۱۰۰ جرېبه ځمکه ځانګړې شوې ده.
چارواکو یو ځل بیا له بهرمېشتو افغان سوداګرو غوښتنه وکړه چې هېواد ته راستانه شي او په کور دننه پانګونه وکړي.
