فاریاب له هغو ولایتونو دی چې په کې په پراخه کچه د ډبرو سکاره، اوسپنه، سره زر، سپین زر، مس، ګچ، نفت او ګاز او مالګې کانونه موجود دي چې دا مهال یې د مالګې کان استخراج پيل شو.
د فاریاب ولایت کانونو رییس مولوي امان الله شیدایي وايي: « تېر کال شاوخوا ۹۲ تر ۹۳ زره ټنه مالګه استخراج شوې وه، موږ امید لرو چې سږکال به دلته د مالګې له کانونو تر ۲۰۰ زرو ټنه مالګه استخراج شي. تېر کالونو کې چې اوبه به په پټیو کې را ټولېدلې، ضایع کېدلې خو الحمدالله سږکال استخراج ښه دی.»
د قراردادي شرکت ساحوي مسوول محمد عمر اوریا وايي: « په ۱۴۰۳ کال کې دغه د اندخوی مالګې معدن شامل دی. په درېیو کاسو میمنه کان، درزاب کان او اندخوی کان کې موږ وکولی شول چې په ۱۴۰۳ کال کې ۳۵۰ جریبه ځمکه پاک کاري کړو. نتیجه یې خورا اغیزمنه ده او ورسره به سږکال د معدن او استخراج ظرفیت هم لوړ شي.»
په همدې حال کې د قراردادي شرکت مسوولین بیا دلته د مالګې کان کیندنې معیار او مسلکیتوب په اړه ډاډ ورکوي.
د قراردادي شرکت ساحوي مسوول محمد عمر اوریا زیاتوي: « موږ چې کوم قرارداد د کانونو او پټرولیم وزارت سره لرو، مطابق د همدې تعهداتو چې له وزارت سره مو کړي، پرې ولاړ یو او عملي کوو یې. یوه موضوع د کان پاک کاري ده چې کړې مو ده، د خرابو اوبو مخنیوي لپاره مو بندونه جوړ کړي، همدا راز معدن ته د غځېدلې لارې ډیزاین او رغونه ده چې ژر به پیل شي. موږ راتلونکو کې د خپل پروپوزل مطابق مخته ځو.»
دلته پر کار بوخت کسان هم خوښ دي چې په کور دننه ورته کاري فرصت رامنځته شوي.
دوی د ورته نورو کاري فرصتونو د ډېروالي غوښتنه کوي او په خبره يې، د بې روزګارۍ کچه به ورسره را ټيټه شي.
کان کېندونکی هاشم خان وايي: « د ورځې ۳۵۰ افغانۍ او درې وخته ډوډۍ راکوي. کار مو ډېر ښه دی او خوار غریب ته تر زیاته همدلته کار موندل شوی. موږ له اسلامي امارت ډېر خوښ یو، خو زموږ غوښتنه داده چې نورو بې کاره کسانو ته هم کاري فرصت چمتوشي.»
یو بل کان کېندونکی عبادالله وايي: « زه ډېر خوښ یم، د ورځې ۳۰۰ تر ۴۰۰ افغانۍ کار کوم، ګذاره مې پرې کېږي.»
افغانستان دا مهال خپله د اړتیا وړ مالګه په کور دننه تولیدوي او له دې پلوه پرځان بسیا دی.
