په داسې حال کې چې افغانستان له جغرافیايي پلوه د سیمې او ګاونډ له هېوادونو سمندري لارې نه لري، د ټرانسپورټ او ټرانزیټ تکیه یې تر ډېره پر هوايي او ځمکنیو لارو ده.
د ټرانسپورټ او هوایي چلند وزارت وایي، هڅه کوي چې د سیمې او نړۍ هېوادونو سره ټرانسپورټي اړیکې پیاوړې کړي.
د ټرانسپورټ او هوایي چلند وزارت معین ملا عبدالسلام حیدري د ګاونډي هېواد قزاقستان د ټرانسپورټ وزارت له مرستیال سره کتلي او دواړو لوریو د کابل او آستانې ترمنځ د مستقیمو الوتنو هوکړې سربېره د دواړو هېوادونو پر حسنه ټرانسپورټي اړیکو، د توکو د لېږد، ټرانسپورټ برخه کې د وړتیاوو پیاوړي کولو، پانګونې پر جلب او جذب هم خبرې کړې دي.
د ټرانسپورټ او هوایي چلند وزارت ویاند حکمت اصفي وايي: « د واټ ټرانسپورټ معین الحاج ملا عبدالسلام حیدري صاحب د قزاقستان هېواد د ټرانسپورټ وزارت له مرستیال سره په لیدنه کې د سیمې او په ځانګړې توګه د دواړو هېوادونو ترمنځ د حسنه ټرانسپورټي اړیکو، د ټي.آی.آر سیسټم له لارې د توکو لېږدونې، د ټرانسپورټ په برخه کې د وړتیاوو په پیاوړي کولو، پانګونې د جلب او جذب او همدارنګه د هوايي چلند پر اړوند مسایلو بحث او خبرې وکړې.»
د ټرانسپورټ او هوایي چلند وزارت د مسوولینو په خبره، اوس مهال افغانستان د کورنيو او نړیوالو هوایي شرکتونو په مرسته بېلابېلو هېوادونو لکه روسیې، سعودي عربستان، ترکیې، هندوستان، ایران، قطر او متحده عربي امارتو ته الوتنې لري او په دې برخه کې د لا اسانتیاوو رامنځته کولو ته ژمن دي.
د ټرانسپورټ او هوایي چلند وزارت ویاند په دې اړه وايي: « د ټرانسپورټ او هوايي چلند اړوند له نړیوالو او محلي هوايي ډګرو په نورمال ډول ملکي الوتنې جریان لري. موږ اوس مهال د نړیوالو او داخلي هوايي شرکتونو په مرسته مختلفو هېوادونو لکه روسیې، سعودي عربستان، ترکیې، هند، ایران، قطر، متحده عربي اماراتو او نورو هېوادونو ته الوتنې لرو. د ټرانسپورټ او هوايي چلند وزارت د واټ ټرانسپورټ په برخه کې د لا نورو اسانتیاوو رامنځته کولو ته ژمن دی.»
د اقتصادي چارو شنونکي له قزاقستان سره د مستقیمو پروازونو پیلېدل مهم او ګټور بولي او ټنیګار کوي چې په دې برخه کې باید په کور دننه هوایي او ټرانسپورټي شرکتونو ته لا ډېرې اسانتیاوې برابرې شي.
د اقتصادي چارو شنونکی عبدالصادق حمیدزوی وايي: « له قزاقستان سره مخامخ پروازونه کولی شي تجارانو ته لا ډېرې اسانتیاوې رامنځته کړي. له دې سره به زموږ اقتصادي پیوستون لا وده وکړي او پیاوړی به شي. هرڅومره ډېر چې افغانستان د نړۍ له هېوادونو او په ځانګړې توګه سیمې سره نښلون پیدا کوي، اسانتیاوې رامنځته کېږي، دا به د افغانستان جیوپولوټیک موقعیت چې له کلونو راهیسې افغانستان ترې ګټه نه ده اخیستې، له دې نښلو سره به خپل امتیاز ترلاسه کړي.»
قزاقستان د مرکزي اسیا له مهمو هېوادونو دی چې له افغانستان سره یې په تېرو کلونو کې سیاسي، اقتصادي او سوداګریزې اړیکې پراخې شوې دي.
دواړه هېوادونه د سیمه ییزو همکاریو، سوداګرۍ، کرنیزو توکو تبادلې، او ټرانزیټي اړیکو په برخه کې ګډې ګټې لري.
د شنونکو باور دا دی چې د نویو مستقمو پروازونو پیلېدو سره به د کابل او استانې ترمنځ سوداګري لا پراخه شي.
