ایراني رسنیو د دې هېواد د مسوولو چارواکو له قوله ویلي، دې هېواد روان ۲۰۲۵ زېږدیز کال له پيله تر دې دمه نږدې ۸۰۰ زره افغان کډوال افغانستان ته استولي.
رسنیو د ایران په کورنيو چارو وزارت کې د بهرنيو اتباعو او کډوالو د برخې د مسوولانو له خولې ویلي، ستنېدونکي کډوال يې بایومټریک کړي او د بېرته نه ورتګ ضمانتونه یې ترې اخیستي دي.
ايراني چارواکو د ټولو غیرقانوني کډوالو پر ایستلو ټينګار کړی او دغه راز یې له خپلې خاورې ایستل کېدونکو افغان کډوالو ته خبرداری ورکړی چې د کډوالو په تورلېست کې يې شاملوي.
د ايران کورنیو چارو وزارت کې د بهرنيو اتباعو او کډوالو چارو رييس نادرياراحمدي ویلي: « د روان کال له پيل راهيسې ۷۷۲ زره افغان کډوال د دوغارون، میلک او ماهيرود سرحدي پولو له لارې افغانستان ته لېږل شوي چې د تېر کال په پرتله ۳۵۰ زره تنه زياتوالی ښيي. موږ هغوی ته سپارښتنه کوو چې له قانوني لارو ايران ته داخل شي او دغه راز ایستل شوي کډوال د ايران په تور لېست کې شامل دي؛ دوی باید د خپلو حقونو او شتمنيو په اړه په افغانستان کې د ايران کونسلي خدماتو له لارې شکايتونه ثبت کړي.»
په ورته مهال، له ایرانه تازه را ایستل شوي افغانان د ایراني پولیسو له ناوړه چلن شکایت کوي او زياتوي، ایراني پوليسو يې هر ډول شتمنۍ ترې اخيستې دي او په سخت وضعيت کې يې افغانستان ته شړلي.
له ایرانه را ایستل شوی عابد وايي: « کورنۍ مې ایران کې پاتې ده، ما په کارخانه کې کار کاوه چې پولیس راغلل او موږ یې ونیولو. بیا یې زموږ په وهلو پیل وکړ، زه یې په لاس په ډنډه ووهلم او لاس مې مات شو.»
ایراني چارواکو دا څرګندونې داسې مهال کړې چې د کډوالو په برخه کې نړیوالو سازمانونو له دې هېواده د افغانانو په ایستلو او د دې بهیر پر لوی شمېر اندېښنې څرګندې کړې دي.
د کډوالۍ نړيوال سازمان (آی.او.اېم) ویلي، په تېرو نهو ورځو کې له ۲۶۴ زرو ډېر افغان کډوال ايستل شوي دي.
په ورته مهال، د کډوالۍ څار نړيوال بنسټ په ايران او پاکستان کې د مدني فعاليتونو له ټولو بنسټونو غوښتي چې له کډوالو سره د يادو هېوادونو د ناوړه چلن پر وړاندې خپل ملاتړ هېر نه کړي.
له دې سره، تېره ورځ د سرپرست حکومت يو شمېر چارواکو هم له تهران وغوښتل چې د افغان کډوالو د ايستلو په پروسه کې له نرمښت کار واخلي او د ګاونډيتوب اړیکې زيانمنې نه کړي.
