د رياست الوزرا اقتصادي مرستيال ملا عبدالغني برادر اخوند د قزاقستان لومړي وزیر مرستیال او د بهرنیو چارو له وزیر سره په لېدنه کې پرسوداګرۍ، ټرانزیټ، اوسپنې پټلۍ، بانکي او اقتصادي همکاریو په اړه خبرې کړې.
د سرپرست حکومت مرستيال وياند حمد الله فطرت وايی، په دې لېدنه کې د دواړو لورو ترمنځ د هرات – تورغونډۍ اوسپنې پټلۍ پروژه کې د قزاقستان له لوري د ۵۰۰ میلیونو ډالرو په ارزښت د پانګونې د پيل په موخه تفاهمنامه هم لاسلیک کړې.
فطرت په دې اړه وايي: « محترم ملا برادر اخوند قزاق پلاوي ته د ښه راغلاست ترڅنګ وویل چې د افغانستان اسلامي امارت له ټولو هېوادونو سره د متقابل اقتصادي همکاریو یو نوی فصل پرانیستی او غواړي تجارتي اقتصادي اړیکې لا پراخې کړي. محترم ملاصاحب د هرات – تورغونډۍ په رېل پټلۍ پروژه کې د پانګونې هرکلی وکړ او وې ویل، دا پروژه نه یوازې د دوه اړخیزو همکاریو د پياوړتیا لپاره مهمه ده بلکې د سوداګرۍ او ټرانزیټ لپاره هم یو سترګام دی.»
حمدالله فطرت زیاتوي، دواړو خواوو د کرنیزو محصولاتو د ساتنې، نړیوال ټرانسپورټ، د افغانستان، ایران، قزاقستان او ترکمنستان ترمنځ د ګډو سوداګریزو همکاریو او د سوداګریزو مرکزونو د پرانیستلو په اړه هوکړو ته رسيدلي چې په عملي کېدو سره به يې سوداګريزه کچه ۳ میليارده ډالرو ته ورسيږي.
د اسلامي امارات مرستيال وياند په دې اړه وايي: « د قزاقستان د لومړي وزیر مرستیال څرګنده کړه چې هېواد یې له افغانستان سره د ټرانزیټي، اقتصادي او اسلامي مشترکاتو پر بنسټ د ښو اړیکو پراخېدو ته ژمن دی او زیاته یې کړه، قزاقستان د افغانستان اسلامي امارت له خوا مطرح شوي ټول وړاندیزونه له خپلو اړوند ادارو سره شریکوي، ترڅو د همکاریو لپاره یوه روښانه لار نقشه برابره شي.»
اقتصادي کارپوهان دا ډول لیدنې د افغانستان او د منځنۍ آسیا هېوادونو ترمنځ د اقتصادي اړیکو د پراخېدو لپاره مهمې بولي او د ترسره شويو هوکړو پر عملي کېدو ټېنګار کوي.
د اقتصادي چارو کارپوه نور الله عزیز وايي: « په هره اندازه چې افغانستان وکولی شي له قزاقستان سره په تجارتي او نورو برخو کې اړیکې پياوړې کړي، دا به د افغانستان لپاره نوې پانګه راولي او په مختلفو سکټورونو کې به د پرمختګ لپاره فرصتونه ولټوي.»
د اقتصادي چارو کارپوه عبدالجبار ساپی وايي:« که موږ وګورو، هرڅومره ډېر چې مرکزي اسیا له افغانستان سره اړیکې جوړې کړي، دا د افغانستان پر ګټه دي. همدارنګه افغانستان د مرکز اسیا لپاره جنوبي اسیا ته د ننوتلو دروازه ده؛ بنا ً دا ډېر اهمیت لري.»
په دې لېدنه کې د ریاستالوزرا اقتصادي مرستیال قزاقي لوري ته ډاډ ورکړی چې افغانستان کولی شي د یوه مؤثر ټرانزیټي دهلېز په توګه، قزاقستان ته دا زمینه برابره کړي چې خپله انرژي د افغانستان له لارې جنوبي اسیا ته ولېږدوي.
