د ملګرو ملتونو په نوښت له نشه یي توکو سره د مبارزې او د افغانستان خصوصي سکټور څخه د ملاتړ په موخه قطر کې د یاد سازمان کاري ډلو او د اسلاميامارت اووه کسیز حکومتي پلاوي ترمنځ خبرې پيل شوې دي.
په افغانستان کې د ملګرو ملتونو سازمان سیاسي استازولۍ) یوناما) په یوه خپره کړې اعلامیه کې لیکلي، په دوحه کې دغه دوه ورځینۍ ناسته له نشه یي توکو سره د مبارزې او د افغانستان خصوصي سکټور څخه د ملاتړ په برخه کې د اسلامي امارت د کړنو او فعالیتونو د بررسي کولو په موخه جوړه شوې.
په دې اعلامیه کې راغلي، د افغانستان په اړه د دوحې ناسته به اسلامي امارت سره د تعامل لپاره وروستي لومړیتوبونه مشخص کړي.
د اعلامیې یوه برخه:« د قطر په پلازمېنه دوحه کې د ځانګړو استازو له درېیمې غونډې وروسته کاري ډلو د تېر کال په جولای کې د ملګرو ملتونو امنیت شورا د سپارښتنو او ارزونو پر بنسټ رامنځته شوې او د افغانستان سرپرست حکومت له چارواکو سره د ښکېلتیا او د افغانانو د ګټې لپاره یې طالبانو سره تعامل کړی. دا دوه ورځنۍ غونډې به هغه کارونه روښانه کړي چې تر اوسه پورې له خصوصي سکتور ملاتړ او نشه يي توکو سره د مبارزې په برخه کې ترسره شوي او د ښکېلتیا لپاره به نور لومړیتوبونه وپېژني.»
په ورته مهال، د اسلامي امارت د بهرنیو چارو وزارت ویاند ضیا احمد تکل وایي، د دوحې ناسته کې د غړیو هېوادونو او ملګرو ملتونو له استازو سره د خبرو لپاره یو لوړ پوړی افغان پلاوی تللی او موخه یې د نشه یي توکو د مخنیوي، بانکدارۍ سیسټم او خصوصي سکټور څخه ملاتړ دی.
تکل په دې اړه وايي: « یاد پلاوي کې د بهرنيو چارو، کورنيو چارو، عامې روغتیا، کرنې او مالدارۍ، تجارت او صنعت، ماليې او اقتصاد وزارتونو او د افغانستان بانک استازي شامل دي. ټاکل شوې دغه پلاوی د بېلابېلو هېوادونو او نړيوالو سازمانونو له استازو سره د نشه يي توکو د مخنیوي او کنټرول، بديل معيشت، د معتادينو درملنې، خصوصي سکټور او بانکدارۍ په برخه کې د ممکنه همکاریو پر پراختیا خبرې وکړي.»
د سیاسي چارو شنوونکي د قطر په نوښت د پیل شویو ناستو په تړاو بېلابېل نظرونه لري.
ځینې دا لړۍ له نړۍ سره د اسلامي امارت د تعامل لپاره ګټوره ګڼي او یو شمېر بیا په دې باور دي چې دا ډول ناستې د بهرنۍ پانګونې د جلب، کاري زمینو برابرولو او د افغانستان د ګنګل شویو شمتنیو د آزادېدو لپاره ترسره کېږي.
د نړیوالو اړیکو شنونکی سمیر انګار وايي: « دا د افغانستان د راتلونکي لپاره یو هیله بښوونکی ګام بلل کېږي. دغه راز د بشري وضعیت ښه کولو، اقتصادي پرمختګ او سیاسي تفاهم لپاره مهم فرصتونه برابروي.»
له نشه یي توکو سره د مبارزې درېیمه او د خصوصي سکټور کمېټې دوېمه ناسته چې د قطر پلازمېنه دوحه کې پيل شوې دي، د بهرنیو چارو، کورنیو چارو، کرنې، صنعت او سوداګرۍ، مالیې وزارتونو او د افغانستان بانک استازي د دوو ورځو لپاره د یو شمېر هېوادونو او د ملګرو ملتونو استازو سره په اړوند مساییلو او ګډې همکارۍ خبرې کوي.
