د ټولیيز امنيت تړون سازمان(سي.اېس.ټي.او)غړیو هېوادونو د بهرنيو چارو وزيرانو په خپله وروستۍ ناسته کې د خپلمنځي نړيوالو مسايلو ترڅنګ، د افغانستان پر وضعيت هم بحث کړی.
دغه ناسته د دوشنبې پر ورځ د قرغيزستان په پلازمېنه بېشکيک کې په يوې ګډې اعلاميې سره پای ته ورسېده.
په اعلاميه کې د ياد تړون غړيو هېوادونو له افغانستان سره د سولې، ثبات او پراختیا په برخو کې د همکاريو ډاډ ورکړ.
د ياد تړون غړیو هېوادونو بهرنيو چارو وزيرانو په ګده اعلامیه کې ویلي، چمتو دي چې له ملګرو ملتونو سره په همغږۍ د افغانستان د پرمختګ د تضمین لپاره په نړیوالو هڅو کې هم فعاله ونډه واخلي.
د ګډې اعلامیې یوه برخه کې راغلي:« موږ یو ځل بیا ژمنه کوو چې د افغانستان د سوله ییز او باثباته راتلونکي لپاره له نړیوالو هڅو سره همکاري وکړو. موږ په دې برخه کې د ملګرو ملتونو ونډه مهمه بولو. موږ له نړیوالې ټولنې غواړو چې د افغانانو د اړتیاوو پوره کولو لپاره بشري مرستې پراخې کړي.»
که څه هم سرپرست حکومت د ټولییز امنیت تړون سازمان د غړیو هېوادونو د بهرنيو چارو وزيرانو ګډې اعلاميې په تړاو څه نه دي ويلي، خو شنونکي د افغانستان په تړاو د دې ایتلاف غړیو هېوادونو دريځ مهم بولي او زیاتوي چې له اقتصادي پلوه له يادو هېوادونو سره د افغانستان نږدې کېدل ګټور کار دی.
د سیاسي چارو شنونکی معین ګل څمکنی وايي: « زموږ له خوا په اوس وخت کې له منځنۍ آسیا سره د ګډو اقتصادي ګامونو پورته کول ډېر مهم دي. موږ پوهېږو چې په دې اړه نوښت د روسیې او چین په مرسته کېږي او هغوی دلچسپي لري چې افغانستان له ځان سره ولري، ځکه له افغانستان پرته د شرقي بلاک جوړول ناممکن دي.»
د سیاسي چارو شنونکی خلیل احمد نادم وايي: « په افغانستان کې د سولې او ثبات لپاره نړیواله اجماع، هم د سیمې او هم د نړۍ پر ګټه ده. په الماتا کې د پخواني شوروي اتحاد غړیو هېوادونو امنیتي ناسته کې د افغانستان په اړه بحث کړی او د منځنۍ آسیا او افغانستان د انکشاف لپاره یې د همغږۍ د یوه دفتر پر جوړېدو ټينګار کړی. دا هم د افغانستان او هم د سیمې پر ګټه دی. د دې مانا دا ده چې افغانستان لاهم د نړۍ مختلفو هېوادونو د پاملرنې په محراق کې ځای لري.»
له دې وړاندې د روسيې په شمول د منځنۍ آسيا ځينو هېوادونو له افغانستانه د ګواښ متوجه کېدو ادعا مطرح کړې وه، خو ځينو نورو هېوادونو بيا په افغانستان کې له وضعيت سره له دې کبله د همکارۍ ټټر وهلی چې په خبره يې د سيمه ييز ثبات اصلي کيلۍ د افغانستان په ثبات کې نغښتې ده.
