په سوریه کې د احمدالشراع پر مشرۍ د نوي حکومت له رامنځته کېدو یوازې اووه میاشتې وروسته، امریکا ورسره رسمي تعامل ته را وړاندې کېږي او په تېر کې پر دغه هېواد ټول لګولي اقتصادي بندیزونه لرې کوي.
د امریکا ولسمشر ډونالډ ټرمپ د تېرې مې میاشتې پر ۱۳مه په لومړي ځل پر سوريې د بندیزونو لرې کولو خبر ورکړ او شاوخوا دوې میاشتې وروسته یې د دوشنبې په ورځ د یوه اجرائي فرمان په لاسلیکولو سره خپله کړې پرېکړه عملي کړه.
د دې فرمان له مخې، امریکا له سوريې ټول هغه بندیزونه لرې کړل چې له ۲۰۰۶ز کال راهیسې یې پر دې هېواد لګولي کړي و.
د سپیڼې ماڼۍ په اعلامیه کې د ولسمشر ټرمپ له قوله راغلي، ټرمپ دغه پرېکړه د سوریې د نوي حکومت له پوره ارزونې وروسته کړې، خو د بشارالاسد د حکومت مشران او لوړ پوړي چارواکي ترې مستثنا دي.
په اعلامیه کې د امريکا ولسمشر له خولې راغلي: « ما دا درک کړه چې ټول هغه کسان باید په واقعي مانا مسوول وګرځول شي او پر وړاندې يې ګامونه پورته شي چې د بشارالاسد د نسکور رژیم په دروان کې یې د جنګي جرایمو، د بشري حقونو نقض او په دغه هېواد کې دننه او بهر يې د نشهیي توکو په قاچاق کې لاس درلود.»
د امریکا ولسمشر له دې وړاندې په سعودي عربستان کې د سوریې له هغه لنډمهالي ولسمشر سره ولیدل چې کلونه کلونه یې د بندیزونه په لیست کې و او پر سر یې نقدي جایزه هم ټاکلې وه.
د امریکا خزانې وزارت چې د دې هېواد بهرنیو چارو او سوداګرۍ وزارتونه سره په ګډه د دې پرېکړې د عملي کولو مسوولیت لري وايي، د بندیزونو لرې کېدل سوریې ته دا موقع په لاس ورکوي چې له نړیوالې مالي انزوا بهر شي او د تېرې کورنۍ جګړې له کبله رامنځته شوې ویجاړۍ او اقتصادي او سوداګریز ځوړ حالت ورغوي.
د امریکا خزانې وزارت ویلي: « پر سوریې د امریکا د بندیزونو لرېکېدلو پرېکړه د سوریې خلکو او هلته له نوي حکومت د ملاتړ په موخه شوې، ترڅو دغه هېواد ورغول شي او د داسې باثباته او هوسا ملت لرلو لپاره فرصتونه په لاس ورشي چې له ځان او خپلو ګاونډیو سره په سوله کې ژوند وکړي.»
د سوریې لنډمهالي ولسمشر احمدالشراع د تېر کال په ډسمبر کې د بشارالاسد۲۴ کلن رژیم ونړاوه او د تمې خلاف یې داسې قانوني او ټولشموله حکومت رامنځته کړ چې د نوموړي دې او ورته کارونو اوس نړۍ بېرته پر سوریې راماته کړه.
د امریکا له دې پرېکړې وروسته، د سوريې بهرنیو چارو وزیر اسدالشېباني د امريکا له دې اقدام هرکلی کړی او په خبره یې، دا ګام کولی شي له اوږده ځنډ وروسته د سوریې بیارغونې او پرمختګ ته لار هواره کړي او اقتصادي خنډونه له منځه یوسي.
د سوريې بهرنیو چارو وزیراسد الشېباني ویلي: « د امریکا د بندیزونو لرې کېدل کولی شي له اوږده ځنډ وروسته د سوریې بیارغاونې او پرمختګ ته لار پرانیزي.»
خو له دې هر څه سره، له سوریې سره د نړۍ نږدېوالی او واقعي تعامل د افغانستان سرپرست حکومت ته څه پیغام لري؟
د سیاسي چارو شنونکی عزیز معارج وايي: « د افغانستان او سوریې لپاره د امریکا پالیسي توپیر لري، خو دلته هم ستونزې شته. زموږ چارواکي هغه شان نرم دریځ نه لري لکه د سوریې مشر احمد الشرع یې چې لري. دوی اصلاحات نه راولي او د نجونو ښوونځي نه پرانیزي. مګر هلته تعامل ته ژر غاړه اېښودل کېږي.»
امریکا داسې مهال پر سوریې بندیزونه لرې کوي چې د افغانستان شاوخوا ۹ میلیارد ډالره شتمني یې ګنګل کړې او له سرپرست حکومت رسمي تعامل نه لري.
