په ننګرهار ولایت کې له قېمتي او نیمه قېمتي ډبرو زینتي توکي جوړېږي.
د دغو توکو د یوې کارخونې مالک وايي، په دې کارخونه يې ۸ میلیونه افغانۍ لګښت راغلی او دا توکي له هغو ډبرو جوړوي چې په کور دننه استخراج کېږي.
د کارخونې مالک عبد الرشید وايي:« بنګړي، هګۍ، لاکټې، ګوتمې او نور داسې ډیکورېشن توکي چې خلک یې الماریو کې ږدي او یا دفترونو کې د زینت او ښکلا لپاره اېږدي، دلته په دې کارخونه کې جوړیږي.»
له دې ځایه دا زینتي توکو په کوردننه یو شمېر ولایتونو او دغه راز ګاونډیو هېوادونو ته استول کېږي.
عبدالرشید وايي، جوړ کړي توکي پاکستان، چین، تاجیکستان، اوزبېکستان او روسیې هېوادونو ته استوي.
هغه زیاتوي:« موږ ته له مختلفو ملکونو خلک راځي، لکه پاکستان، تاجیکستان، اوزبېکستان، قراقستان، روس او زیاتره د چین خلک راځي. هغوی د دې ډبرو ډېر شوقمن دي. اوس مهال موږ دلته له نفرایټ او سرپنټین ډبرو توکي جوړو.»
د دې کارخونې کارګران ټینګار کوي، که ورته کاري زمینې ډېرې او پانګوال په هره برخه کې کارخونې جوړې کړي، پر بې کارۍ سربېره به د کډوالۍ په مخنیوي کې هم ګټه وکړي.
د کارخونې یو تن کارګرن احسان الله وايي: « باید زموږ د دې کارخونو مشرانو ملاتړ وشي او باید د تیږو او هر نورو شیانو تعرفې ورته ارزانه شي. موږ کوشش کوو نوي کسان ونیسو ،ترڅو دلته کار وکړي او نورو ملکونو لکه ایران یا بهرنیو ملکونو ته احتیاج نه شي.»
یوبل کارګر عبد الرازق وايي: « باید صنعت کارانو ته زمینه برابره شي چې په وطن کې فابریکې ډېرې شي، ترڅو دلته کار پیدا او ځوانان خارج ملکونو ته لاړ نه شي.»
بله خوا، د ننګرهار صنعت او سوداګرۍ ریاست مسوولین وايي، د صنعت د ودې او پرمختګ په موخه پر صنعت کارانو د ځمکو د وېش، دوی ته د برېښنا زیاتوالي او همدارنګه توکو ته یې د بازار موندنې په برخه کې د نندارتونو جوړولو لپاره هڅې روانې دي.
د ننګرهار صنعت او سوداګرۍ ریاست د سوداګریزو چارو آمر شاکر الله ستانکزی وايي: « د صنعت او سوداګرۍ د ملاتړ په موخه حکومت ځینې پالیسۍ جوړې کړې دي چې له ډلې یې په خامو موادو کې معافیت دی. همدارنګه ۲۰ زره جریبه ځمکه به صنعت کارانو ته د یو خاص طرز العمل پر اساس ووېشل شي. همدارنګه د بازار موندنې لپاره مو په داخل او خارج کې نندارتونونه پلان کړي چې یو نندارتون دا تېرې وري میاشت کې جوړ شو.»
اوس مهال په ننګرهار کې له قېمتي او نیمه قېمتي ډبرو د زینتي توکو د جوړولو پر کارخونو سربېره، د دغو توکو د پېر او پلور په موخه یو ځانګړی مارکېټ هم پرانیستل شوی دی.
