که څه هم افغانستان د يوه مصرفي هېواد په توګه له بهر پر وارداتو تکيه دی، خو صادرات هم لري چې ډېره اندازه يې وچې او تازه مېوې او موسمي محصولات دي.
تازه سرپرست حکومت په یو شمېر برخو کې په بشپړه توګه ځان بسياينې ته د افغانستان رسېدو خبر ورکوي او زياتوي چې افغانستان دا مهال ۱۳۰ برخو کې په بشپړه توګه او په شاوخوا ۱۰۰ نورو برخو کې نيمه ځان بساينې ته رسېدلی.
د اسلامي امارت مرستیال ویاند حمدالله فطرت وايي: « په ټول هېواد کې شاوخوا ۶ زره صنعتي فابریکي په رسمي ډول فعالیت کوي چې پر مټ یې اوس مهال افغانستان په ۱۳۰ برخو کې بشپړې او په ۱۰۰ نورو برخو کې نیمه خودکفايي ته رسېدلی.»
فطرت زیاتوي، اوس مهال په ټول هېواد کې شاوخوا ۶ زره صنعتي کارخونې فعالیت کوي چې پر مټ یې ۵۷۰ ډوله توکي تولیدېږي او نږدې ۱۳۵۰۰۰ کسان په کې په مستقیم ډول پر کار بوخت دي.
د اسلامي امارت مرستیال ویاند په دې اړه وايي: « دغه کارخونې ۵۷۰ ډوله توکي لکه اوړه، غوړي، مالګه، درمل، اوسپنه، فولاد، سیمنټ، کیمیاوي او محصولاتي توکي او داسې نور مواد تولیدوي. په دغو فابریکو کې شاخوا ۱۳۵ زره هېوادوالو ته په مستقیم ډول کاري مصروفیت پیدا شوی.»
د اقتصادي چارو شنونکي بیا د لوږې او بېوزلۍ په ختمولو کې د کارخونو رول مهم بولي او ټینګار کوي چې سرپرست حکومت يې باید د فعاليت پراختيا لپاره د کارخونو او صنعتکارانو ستونزې حل کړي.
د اقتصادي چارو شنونکی عبدالصادق حمیدزوی وايي: « اسلامي امارت ته په کار ده چې په دې برخه کې پوره توجه وکړي، برېښنا، مواد، ماشینري او معافیت هغه ګامونه دي چې داخلي او بهرني پانګوال هڅوي چې دلته پانګونه وکړي.»
د پوهنتون استاد صمیم جاهد وايي: « افغانستان باید په ډېرو برخو او په ځانګړې توګه تولیدي برخو کې ځان بسیاینې ته ورسېږي، ترڅو له دې لارې په مستقیمه او غیر مستقیمه توګه افغانانو ته د کار زمینه برابره شي. په کار دا ده چې هغو برخو کې چې لوړې معلوماتي ټېکنالوژۍ ته اړتیا لري، داخلي او خارجي پانګونه جذب کړو، ترڅو وزګارو کسانو ته د کار زمینه برابره شي.»
صنعتکارانو ته د ځمکو وېش، د اړتیا وړ خامو موادو برابرول، له بهر پر واردېدونکو خامو موادو او ماشین الاتو تعرفې ټیټول، د کورني صنعت د پیاوړتیا په موخه په کور دننه او بهر د نندراتونو جوړول هغه غوښتنې دي چې ډېر کله د صنعکارانو له خوا مطرح او سرپرست حکومت یې په دې نوي راپور کې د حل ډاډ ورکړی.
