امریکا له اته ورځني ځنډ وروسته په منځني ختیځ کې د خپل متحد اسراییل مرستې ته ور ودانګل او د ایران پر درېیو اټومي سایټونو له هوايي برید سره د روانې جګړې درېیم اړخ شوه.
د دې هېواد ولسمشر په یوه ویډیويي پیغام کې د برید خبر تایید کړ او ویې ویل، د امریکا هوايي ځواک د بي دوه (بي ټو) ډوله پرمختللیو بمب غورځوونکو الوتکو په وسیله چې رادار سیسټمونه یې هم نه شي موندلی، د ایران فُردو، نطنز او اصفهان اټومي تأسیسات پر نښه او په بشپړ ډول له منځه یوړل.
ډونالډ ټرمپ دغه عملیات ډېر بریالي بللي او ایران ته یې ګواښ کړی، که سولې حاضر نه شي، د امریکا راتلونکي بریدونه به ډېر پراخ او اسانه وي.
ټرمپ په دې اړه وايي: « لږ مخکې د امریکا پوځ د ایران پر فردو، نطنز او اصفهان مهمو اټومي تأسیساتو دقیق برید ترسره کړ. تاسو ټولو به دغه نومونه اورېدلې وي چې له کلونو راهیسې یې په ویروونکي ډول ویجاړوونکي اقدامات په کې طرح کېدل. زموږ موخه د ایران د هستوي غني کولو ظرفیت له منځه وړل او د هغو ګواښونو درول و چې د نړۍ د ترهګرۍ لومړي ملاتړي هېواد له لوري پېښېدل. نن نړۍ ته ویلی شم چې زموږ بریدونه د پوځي بریا له اړخه ډېر عالي وو. د ایران مهم او ډېر مهم هستوي تأسیسات په بشپړ ډول له منځه یوړل شول. ایران د منځني ختیځ د یو زورواکي هېواد په توګه باید اوس سوله وکړي. که داسې ونه کړي، زموږ راتلونکي بریدونه به ډېر پراخ او اسانه وي.»
ایران د امریکا بریدونو ته په غبرګون کې له امریکا سره د جګړې اعلان کړی او ویلې یې دي، له دې وروسته به امریکا په منځني ختیځ کې د خپلو ځواکونو او پوځې اډو د هدف ګرځولو لیدونکې وي.
له برید وروسته، ایران پر اسراییلو شاوخوا۵۰ توغندیز بریدونه کړي خو په سیمه کې د امریکا پر پوځي اډو د برید راپور نه دی ورکړل شوی.
ایراني چارواکي د برید په سیمو کې د راډیو اکټیف وړانګو خپرېدل په کلکه ردوي او وايي، دوی له برید وړاندې دغه سیمې له اټومي موادو خالي کړې وې.
د ايران انقلابي ګارد یا سپاه پاسداران ویلي: « واشنګټن له خپلو تېرو پرله پسې ناکامیو د عبرت پرځای، زموږ پر اټومي تأسیساتو له برید سره ځان د یرغل په لومړۍ کرښه کې ودراوه. لکه څنګه مو چې پخوا ویلي، په سیمه کې د امریکا د پوځي اډو شمېر، وېشلی حالت او پراختیا نه یوازې دا چې د ځواک نښه نه ده بلکې دوی ته د زیان رسولو کچه لا پسې لوړوي.»
د اسراییلو لومړي وزیر د امریکا د اقدام له کبله ډونالډ ټرمپ ته مبارکي ویلې او وايي، د ایران پر اټومي تأسیساتو برید یې د اسراییلو په همغږۍ ترسره شوی او دا په منځني ختیځ کې د سولې راوستلو لپاره ټاکوونکی ګام دی.
بنیامین نتنیاهو په ویډیويي پیغام کې ویلي، سوله یوازې د ځواک او زور ښودنې له لارې راتلی شي او په وینا یې، امریکا د خپل زور په کارولو سره د سولې راوستلو لپاره ګام پورته کړ.
نتنیاهو زیاته کړې: « ولسمشر ټرمپ او زه ډېر کله دا وایو چې سوله د ځواک کارونې له لارې راتلی شي. لومړی ځواک، وروسته بیا سوله. پر همدې اساس ولسمشر ډونالډ ټرمپ او امریکا له پوره ځواک او غښتلتیا سره د ایران پر وړاندې اقدام وکړ. ولسمشر ټرمپ! زه، د اسراییلو خلک او د تمدن ځواکونه ټول له تا ډېره منندوی یو.»
له ایرانه اخوا امريکا کې هم د ټرمپ ادارې دغه اقدام له پراخو نیوکو سره مخ شوی او دې ګام د کانګرېس غړي په دوو ملاتړ او مخالفو ډلو وېشلي دي.
سره له دې چې په کانګرېس کې د ولسمشر ټرمپ دغه اقدام له یوې خوا یو اړخیز او د امریکا د اساسي قانون خلاف عمل بلل شوی، له بلې خوا یې ډیموکراټان سخت په غوسه کړي او د نوموړي د استیضاح غوښتنه یې مطرح کړې ده.
د کانګرېس غړې الکساندریا اوکازیو کورتز ویلي: « له اجازې پرته پر ایران د بمبارۍ فاجعه زېږوونکې پرېکړه د اساسي قانون او د کانګرېس د جګریزو واکونو خلاف کړنه ده. د بېړې له مخې د ولسمشر دغه کار د داسې یوې جګړې ګواښ زیات کړی چې څو نسله به اغېزمن کړي. د ولسمشر دغه کار له شک پرته او په واضح ډول د نوموړي استیضاح ته لار هواره وي.»
امریکا د ډونالډ ټرمپ په امر داسې مهال د ایران پر درېیو اټومي سایټونو هوايي بریدونه او د هغو د له منځه وړلو خبره کوي چې نوموړي دوه ورځې وړاندې ویلي و چې د اسراییلو او ایران ترمنځ په جګړه کې د ښکېلېدو او د مستقیم برید په تړاو دوه اوونۍ وروسته پرېکړه کوي.
د ډونالډ ټرمپ په خبره، لا هم ایران سره د اټومي پروګرام په سر د خبرو اترو کولو فرصت شته دی.
