قزاقستان ته د صنعت او سوداګرۍ وزارت د سرپرست پر مشرۍ د سوداګریز پلاوي له سفر وروسته، د صنعت او سوداګرۍ سرپرست وزیر نورالدین عزیزي د قزاقستان له ولسمشر قاسم جومارت توکایف سره د اقتصادي مسایلو او سوداګرۍ په ګډون په یو شمېر موضوعاتو خبرې کړې.
د صنعت او سوداګرۍ وزارت سرپرست د ممنوعه ډلو له لېست د اسلامي امارت د نوم ځنډول او دغه راز په هېواد کې د قزاقستان پانګونه د کاري فرصتونو په رامنځته کولو کې ارزښتناکه بللې.
د صنعت او سوداګرۍ وزارت ویاند اخندزاده عبدالسلام جواد وايي: « د افغانستان اسلامي امارت د صنعت او تجارت وزارت سرپرست نورالدین عزیزي د قزاقستان جمهوریت ته د خپل سفر په دوام د دې هېواد له ولسمشر محترم قاسم جومارت توکایف سره لیدنه کړې. ښاغلي توکایف زیاته کړه چې په قزاقستان کې د ملګرو ملتونو د استازولۍ جوړېدل د مرکزي آسیا د هېوادونو او په ځانګړې توګه د افغانستان ستونزو ته د رسېدنې لپاره، د دې هېواد له طرحو یوه وه. ښاغلي عزیزي هم د تورغونډۍ په رېل کرښه کې د قزاقستان له ۵۰۰ میلیوني پانګونې، بشردوستانه مرستو او د افغانستان په اړه د دې هېواد له پالیسیو مننه وکړه.»
دواړو خواوو په دې غونډه کې په دې هم هوکړه کړې چې د قزاقستان د بهرنیو چارو وزیر به په نږدې راتلونکي کې افغانستان ته په رسمي سفر راشي.
د اقتصادي چارو کارپوهان دا ډول غونډې او د افغان چارواکو سفرونه په افغانستان کې د بهرنۍ پانګونې د راجلبولو او په هېواد کې د کاري فرصتونو د برابرولو لپاره مهمې او ارزښتناکې ګڼي.
د اقتصادي چارو شنونکی نورالله عزیز وايي: « له قزاقستان سره د افغانستان اقتصادي او تجارتي اړیکې به نه یوازې دغه اړیکې پیاوړې کړي، بلکې دا به افغانستان ته لاره هواره کړي چې د منځنۍ آسیا له ډېرو هېوادونو سره تجارتي او اقتصادي اړیکې ولري او د هغوی له بازارونو په مختلفو برخو کې ګټه واخلي، د صادراتو اندازه لوړه کړي او له دې هېوادونو د افغانستان د اړتیا وړ توکي وارد کړي. دغه کار کولی شي د افغانستان په داخل کې پانګونې ته لاره هواره کړي.»
په ورته وخت کې، یو شمېر نور کارپوهان په دې باور دي چې د ملګرو ملتونو سیاسي استازولۍ(یوناما) فعالیت او هېوادونو سره تعاملات د افغانستان د سیاسي او اقتصادي پرمختګ لپاره مهم دي.
د اقتصادي چارو کارپوه عبدالنصیر رشتیا وايي: « له قزاقستان سره د غوره او ستراتیژيکو اړیکو لرل له افغانستان سره مرسته کوي چې د قزاقستان له لارې د روسیې بازارونو او دغه راز اروپا ته ځان ورسوي. زما په اند، هرڅومره چې دغه اړیکې پیاوړې شي، بې له شکه چې د سیمه ییزې همپالنې سبب به شي او دا کولی شي په سیمه کې دایمې سوله او ثبات ټینګ کړي.»
د صنعت او سوداګرۍ وزارت سرپرست نورالدین عزیزي د روان کال د جوزا پر ۲۷مه د استانې فورم په ناسته کې د ګډون لپاره قزاقستان ته تللی و.
د وزارت د چارواکو په وینا، ټاکل شوې چې هغه به په دې غونډه کې په افغانستان کې د پانګونې فرصتونو او اقتصادي ودې په اړه وینا وکړي.
