د تاجیکستان پلازمېنه دوشنبې کې د کوربه هېواد تاجیکستان، افغانستان، پاکستان، قزاقستان، اسلامي پراختیایي بانک او د ځینو بهرنیو ادارو او بنسټونو د استازو په ګډون ناسته کې د کاسا زر پروژې د چارو د چټکتيا په موخه يو شمېر هوکړې لاسليک شوې.
د افغانستان برېښنا شرکت وايي، د دې هوکړو او پرېکړو پر بنسټ به د کاسا زر پروژې پاتې کارونه چټک شي.
د افغانستان برېښنا شرکت وايي:« د کاسا زر پروژې اړوند ناستې په پای کې د افغانستان برېښنا شرکت رهبرۍ او د قزاقستان، تاجیکستان او پاکستان هېوادونو د برېښنا او انرژۍ وزیرانو ترمنځ د پروژې د چارو چټکولو په موخه یو شمېر پرېکړې او تصمیمونه لاسلیک شول چې له مخې به یې د کاسا زر پروژې پاتې کارونه چټک شي.»
په افغانستان کې د کاسا زر پروژه د کندوز، بغلان، پنجشېر، کاپیسا، کابل، لغمان او ننګرهار ولایتونو له ۳۳ ولسوالیو تېرېږي چي د دې پروژې په عملي کېدو سره به یاد ولایتونه له برېښنا هم برخمن شي.
د اقتصادي چارو شنونکي وايي، د کاسا زر پروژې چارو پیل د افغانستان په ګډون د سيمې هېوادونو لپاره حياتې ارزښت لري.
د اقتصادي چارو شنونکی نور الله عزیز وايي: « د دې پروژې پر وړاندې ډېرې ستونزې موجودې دي. دا چې د پیل په برخه کې همېشه ټکنۍ کېږي، لامل یې سیاسي بې ثباتي ده، په سیمه کې ستونزې دي، تخنیکي او اقتصادي موضوعات، په پانګونه کې د همغږۍ کموالی دی. ترڅنګ یې هغه څه چې دا پروژه تر ډېره متأثره کوي، بیا هم د هېوادونو ترمنځ د اړیکو په برخه کې ناهنجاریانې دي.»
دغه راز ځینې نور بیا سياسي بې ثباتي، تخنیکي موضوعات، په پانګونه کې د همغږۍ کموالی او د هېوادونو ترمنځ په اړېکو کې شته ستونزې د دې پروژې پر وړاندې د ننګونو په توګه يادوي.
کاسا زر پروژه له قرغیزستانه د تاجکستان او افغانستان له لارې پاکستان ته د برېښنا د لېږد تر ټولو ستره پروژه ده چې د پخواني حکومت پر مهال يې لومړني کارونه پیل شول، خو په افغانستان د اسلامي امارت بیا واکمنېدو وروسته يې چارې په ټپه درېدلې وې.
د دې پروژې ټول لګښت ۱.۱۷ میلیارده ډالره اټکل شوی چې په تېرکې نړیوال بانک، امریکا، انګلستان، د اروپا د پانګونې بانک او اسلامي پرمختیايي بانک د دغو پیسو د ورکړې ژمنې کړې وې.
