د صنعت او سوداګرۍ وزارت وايي، دا ناسته چې د درې واړو هېوادونو د استازو ترمنځ ترسره شوه، په کې پر بېلابېلو موضوعاتو بحث او خبرې شوې دي.
د صنعت او سوداګرۍ وزارت د مسوولین وايي، په دې ناسته کې د ګډو صنعتي پارکونو پر جوړولو، د ځانګړو اقتصادي زونونو پر تاسیس، د صادراتو لپاره د پروسېس د ګډو مرکزونو پر جوړولو او درې اړخیزو سوداګریزو نندارتونونو پر تنظیم بحث شوی.
د صنعت او سوداګرۍ وزارت ویاند اخوندزداه عبدالسلام جواد وايي: « په دې درې اړخیزه ناسته کې د یو شمېر مهمو موضوعاتو په اړه لکه په افغانستان کې د ګډو صنعتي پارکونو جوړول، د ځانګړو اقتصادي زونونو رامنځته کول، د صادراتو د پروسېس لپاره د مرکزونو جوړول، د درې اړخیزو تجارتي نندارتونو جوړول، په افغانستان کې له کوچنیو او منځنیو تشبثاتو د ملاتړ لپاره د مرکزونو جوړول او د درې واړو هېوادونو ترمنځ د بانکي اړیکو اسانه کولو په اړه بحث او د نظر راکړه ورکړه وشوه.»
جواد زیاتوي، د کوچنیو او منځنیو تشبثاتو د ملاتړ لپاره د مرکزونو په جوړولو او د درې واړو هېوادونو ترمنځ د بانکي اړیکو اسانتیا باندې هم بحث او خبرې شوې دي.
په ورته مهال، د اقتصادې چارو شنونکې وايي، د افغانستان اقتصادي پياوړتیا لپاره دا ډول ناستې او له هېوادونو سره د اړیکو پياوړتيا او پراختيا لپاره مهمې دي.
د دوی په خبره، چین پر نړيواله کچه اقتصادي قدرت دی او ورسره د افغانستان اړيکې کولی شي د دواړو هېوادونو سوداګري وغوړوي.
د اقتصادي چارو شنونکی نورالله عزیز وايي: « له چین او پاکستان سره په سیاسي، تجارتي او اقتصادي برخه کې د اړیکو پیاوړتیا هغه څه دي چې کولی شي افغانستان ته په ډېرو برخو کې نوي فرصتونه رامنځته کړي. چین په نړیوال تجارت او اقتصاد کې پراخ لاس لري او له دوی سره د اړیکو پراختیا کولی شي د افغانستان لپاره په ټولو برخو کې ښه فرصتونه برابر کړي.»
له بلې خوا، ځینې نور بیا وايي، اسلامې امارت دې چینايي سوداګر وهڅوي چې په افغانستان کې پانګونه وکړي او په لویو او کوچنیو پروژو کار پيل کړي.
دوی زیاتوي، یوازې ناستې د حل لاره نه ده او اړتيا ده چې سرپرست حکومت هېوادونو او پانګوالو ته د پانګونې په برخه کې د عملي کارونو زمينه برابره کړي.
د اقتصادي چارو شنونکی محمد یونس ځدراڼ وايي: « که چېرې له چین سره د حکومت له خوا داسې قراردادونه وشي چې له مخې یې افغان وګړي چین ته د ټرېننګ یا مسلکي زده کړو لپاره واستول شي، ترڅو په مختلفو برخو کې زده کړې وکړي او بېرته افغانستان ته په راتګ سره د عصري ماشینرۍ په کارولو کې مرسته وکړي؛ دغه راز که موږ وکولی شو د ټکنالوژۍ په برخه کې د چین هېواد مرسته خپله کړو، دا به ډېرې ګټې ولري.»
د شنونکو په خبره، دا مهال په افغانستان کې د بې کارۍ کچه ورځ تر بلې لوړېږي او له امله يې ځوانان د کډوالۍ په موخه د هېواد پرېښودو ته مجبورېږي.
دوی ټينګار کوي چې سرپرست حکومت دې په مشخصو برخو کې د ځوانانو روزلو لپاره د چين په شمول د هغو هېوادونو له تخنيکي ظرفيت ګټه واخلي چې ښې اړيکې ورسره لري.
