د چهارشنبې شپه پر پاکستان د هند په نظامي بريد کې که څه هم هند د شاوخوا ۱۰۰ ترهګرو د وژلو ادعا کړې، خو پاکستان بيا وژل شوي کسان ملکيان بولي او د وژل شویو شمېر يې ۲۶ او د ټپيانو هغو يې ۴۶ ښودلی.
د هند حکومت ادعا کړې چې د سندور عملیاتو د یوې برخې په توګه یې د پاکستان په خاوره او د دې هېواد تر کنټرول لاندې کشمیر کې د ترهګرو نهه مرکزونه پر نښه کړي دي.
پاکستان دغه ادعا نه مني او وايي، په مظفراباد، کوټلي او بهاولپور کې ملکي سیمې پر نښه شوې دي.
هند دا بريد د کشمیر په پهلګام کې پر سيلانيانو د شوي برید غچ اخيستنه بولي او موخه يې په پاکستان کې د ترهګریزو بنسټونو له منځه وړل ګڼلي دي.
د هند د پوځ لوړ پوړې چارواکې صوفیه قریشي په دې اړه وايي: « ګرانو هېوادوالو! تاسې پوهېږئ چې د ۲۰۲۵ کال اپریل میاشتې پر ۲۲مه نېټه د کشمېر په پهلګام کې څنګه په بې رحمانه ډول بې ګناه خلک په نښه او ووژل شول؟ موږ تېره شپه ناوخته په یوه نیمه بجه د هغو بې ګناه خلکو غچ واخیست. د هند زوړو سرتېرو د سندور په عملیاتو کې ټول هغه ځایونه پر نښه کړل چې ترهګر په کې مېشت وو او یا په کې روزل کېدل. باید په واضح ټکو ووایو چې په دې بریدونو کې ملکي خلکو ته زیان نه دی اوښتی.»
اخوا هند دا هم تایيد کړې چې د دې هېواد تر کنټرول لاندې کشمیر کې د پاکستان ځوابي بريد په پايله کې ۱۰ تنه وژل شوي او ۴۷ نور ټپيان دي.
د پاکستان لومړي وزیر شهباز شریف د هند له لوري د پاکستان پر خاوره برید ته سخت غبرګون ښودلی او ويلي يې دي د پاکستان پوځ او خلک پوهیږي چې د يادو بريدونو په بدل کې څه وکړي.
شریف زیاته کړې: « زموږ مکار دوښمن د پاکستان په خاوره کې دننه برید کړی. موږ به هغوی ته کلک او غاښ ماتونکی ځواب ورکړو. پر موږ شوی برید به هېڅکله بې ځوابه پاتې نه شي. د پاکستان ټول خلک له پوځ او خپل حکومت سره ولاړ دي. د دوښمن برید به بې ځوابه پاتې نه شي.»
د نوموړي دغه څرګندونې داسې مهال دي چې د پاکستان دفاع وزارت ویلي، د هند له لوري د بريد پرمهال يې د دې هېواد ۶ الوتکې راغوځولې دي.
د دې هېواد د پوځ لوی درستیز عاصم منير بیا دا رد کړې چې ګني د هند او پاکستان جنګي الوتکې دې د يو بل حريم ته داخلې شوې وي.
له بلې خوا، د جيش محمد ډلې مشر په يوه بیان کې په داسې حال کې چې پاکستان د هند په بريدونو کې وژل شوي کسان ملکيان بللي، خبر ورکړی چې د پنجاب ايالت په بهاولپور کې د هند د بريد له امله یې د کورنۍ۱۰غړي او څلور مهم ملګري وژل شوي دي.
پر پاکستان د هند برید ته په نړیواله کچه غبرګونونه هم ښودل شوي.
د ملګرو ملتونو په ګډون د امریکا ولسمشر ډونالډ ټرمپ د دواړو اټومي قدرتونو ترمنځ د کړکېچ زیاتېدو مخنیوي لپاره د زغم غوښتنه کړې.
همدارنګه د امریکا د بهرنیو چارو وزیر مارکو روبیو هم د هند او پاکستان د ملي امنیت سلاکارانو سره په یوه غونډه کې له دواړو هېوادونو غوښتي چې د تاوتریخوالي له زیاتولو ډډه وکړي.
د اسلامي امارت سرپرست حکومت هم د هند او پاکستان تر منځ روان کړکېچ د اندېښنې وړ بللی او د سیمې روان وضعیت لپاره یې زیان اړوونکی بولي.
د بهرنیو چارو وزارت یوه اعلامیه کې ویلي، امنیت او ثبات د ټولې سیمې لپاره مهم او پر ګټه دی.
د اعلامیې یوه برخه:« د افغانستان اسلامي امارت امنيت او ثبات د ټولې سیمې پر ګټه بولي او پر دواړو لوریو غږ کوي چې له زغم کار واخلي او ستونزې د ډيپلوماسۍ له لارې په خبرو او تفاهم سره حل کړي.»
د دغو غبرګونو په لړ کې د افغان سولې لپاره د امریکا پخواني ځانګړي استازي زلمي خلیلزاد هم خبرداری ورکړی چې روان تاوتريخوالی د دواړو خواوو پر زيان دی.
خلیلزاد پر خپله اېکس پاڼه لیکلي: « په کشمیر کې د سیلانیانو وژنه او اوس په پاکستان کې پر اهدافو د هند برید د پېښو یوه وحشتناکه لړۍ ده. دواړه خواوې باید د تاوتریخوالي د زیاتېدو مخه ونیسي. تاوتریخوالی د ناورین لاره ده.»
د کشمیر په اړه د هند او پاکستان ترمنځ اختلاف او له امله يې وخت ناوخت تاوتریخوالی اوږد تاریخ لري.
دواړه هېوادونه دا سیمه د خپلې خاورې برخه ګڼي او په تېر کې یې په اړه څو ځله جګړې هم کړې دي.
اوسنی کړکېچ دوې اوونۍ وړاندې د هند تر کنټرول لاندې کشمیر په پهلګام سیمه کې پر سیلانیانو له مرګوني برید سرچینه اخلي.
په دې برید کې ۲۶ کسان ووژل شول.
