یو شمېر ازبېکستاني رسنیو د روسیې د لومړي وزیر مرستیال له قوله راپور ورکړی چې نوموړي د منځنۍ آسیا د اینوروم په نړیوال نندارتون کې د افغان ـ ټرانس رېل ګاډي پټلۍ لارې په تړاو څرګندونې کړې دي.
دنیس مانتوروف ویلي، د دې لویې پروژې له بشپړېدو وروسته به په لومړي کال له ۸ تر ۱۵ میلیونه ټنه توکي ولېږدول شي.
د مانتورفو په خبره، د دې لویې پروژې چارې به تر ۲۰۲۶زېږدیز کال پورې بشپړې شي.
مانتوروف ویلي:« لومړني مالومات ښیي چې د افغان ـ ټرانس پروژې له بشپړېدو وروسته به په لومړیو کې له ۸ تر ۱۵ میلیونو ټنو توکي ولېږدول شي. دا چاره په تحولاتو او وخت پورې اړه لري. اصلي لېږدېدونکي توکي به کیمیاوي کوډ، نفتي توکي، اوسپنه، د ډبرو سکاره او یو شمېر نور توکي وي.»
په همدې حال کې د ټولګټو چارو وزارت ویاند د افغان- ټرانس د اورګاډي پټلۍ له همکارو هېوادونو مننه کوي او دا پروژه د افغانستان لپاره ارزښتناکه ګڼي.
محمد اشرف حق شناس وايي، د دې وزارت چارواکو د مطالعاتو د پراخولو او د امکان سنجۍ په موخه د ځينو هېوادونو له چارواکو سره خبرې کړې دي.
حق شناس زیاتوي: « د افغان ټرانس پروژې د امکان سنجۍ د پیل موافقه وشوه. هغه هېوادونه چې د دې پروژې د عملي پیل په اړه اقدام کوي، د افغانستان اسلامي امارت د ټولګټو وزارت یې هرکلی کوي.»
له بلې خوا، د اقتصادي چارو کارپوهان وایي، د اورګاډي د کرښو او ستندرد ټرانسپورټي لارو د نه شتوالي له امله، د افغان- ټرانس پروژه د افغانستان د نړيوالو بازارونو سره د نښلولو لپاره مهمه ده.
د دوی په خبره، د افغانستان د صادراتو او وارداتو زیاتوالی د دې پروژې له بشپړېدو سره مخامخ اړیکه لري.
د اقتصادي چارو کارپوه نورالله عزیز وايي: « په مجموع کې باید ووایم، دا پروژه د افغانستان لپاره ستر اقتصادي ارزښت لري چې نه یوازې د تجارت د پراختیا په برخه کې به لویې لاسته راوړنې ولري، بلکې ترڅنګ به یې وکولی شي خلکو ته د کاري فرصتونو برابرولو او نویو پانګونو د جذب لپاره هم زمینه برابره کړي.»
ټاکل شوې ده چې د افغان- ټرانس اورګاډي کرښه به اروپايي ټولنه، روسیه، ازبېکستان، افغانستان، پاکستان، هند او د جنوب ختیځې آسیا هېوادونه سره ونښلوي چې اصلي ګډونوال یې ازبېکستان، افغانستان او پاکستان هېوادونه دي.
