د افغانستان مرکزي بانک چارواکي وايې، د افغانیو ثبات او پياوړتیا او دغه راز د بانک نوټونو له زړښت د مخنیوي لپاره هڅه کوي چې پیسو ته د خلکو اسانه لاسرسي په اړه بریښنايي سیسټم فعاله کړي.
دوی زیاتوي، په همدې سیسټم د خلکو پوهېدنې لپاره په مزار شریف ښار کې درې ورځنی نندارتون پرانیستل شوی دی.
د افغانستان بانک ویاند حسیب الله نوري وايي: « همدارنګه د کارتونو په برخه کې اسانتیاوې، د اداینیزو سیسټمونو د پراختیا په برخه کې همکاري کوو. همدارنګه د معاشونو او لګښتونو د انتقال په برخه کې زموږ هېوادوال او په تېره بیا دولتي کارکوونکي له ستونزو سره مخ وو چې د دې سیسټم په فعالېدو سره به دولتي چارواکي، مامورین او نور معاش لرونکي کسان خپلو معاشونو ته اسانه او هرځای کې لاسرسی ولري.»
د افغانستا بانک عمومي مرستیال صدیق الله خالد وايي، له دې سیسټم سره به د دولتي او نا دولتي ادارو کار کوونکي خپلې پیسې د بانکونو پر ځای له خپلو بانکي کارتونو په اسانۍ ترلاسه کولی او مصرفولی شي.
خالد په دې اړه وايي: « تاسو ته مالومه ده چې تادیاتي سیسټمونه د هر هېواد د زیربناوو یوه برخه ده چې د پیسو لېږد اسانه کوي، اقتصادي ثبات ته وده ورکوي او د بانکي سېکټور مؤثریت ډېروي. دا سیسټمونه د خلکو، حکومتونو او سوداګریو ترمنځ په مالي راکړه ورکړه کې خونديتوب او شفافیت رامنځته کوي او د پیسو د لېږد سرعت ډېروي. له دې سره به سوداګریز فعالیتونه لا اغېزناک او مؤثریت پیدا کړي.»
ورته مهال، سوداګر د بانکي سیسټم له برېښنايي کېدو هرکلی کوي او ژر تر ژره یې د پلي کېدو غوښتنه کوي.
د دوی په خبره، هېواد کې د دې سیسټم فعالیت به سوداګرو ته ګڼې اسانتیاوې برابرې او سوداګري به په عصري سیسټم بدله کړي.
سوداګر قلندر رحیمي وايي: « دغه سیسټم زموږ د اقتصادي معاملاتو چټکتیا ډېروي او د هېواد د اقتصادي ودې سبب کېږي. د دې سیسټم په فعالېدو سره به په بانکونو کې فزیکي حضور، اوږده انتظار، د مختلفو فورمو له ډکولو او وخت ضایع کېدو مخنیوی وشي.»
په همدې حال کې د بلخ ولایت ځايي چارواکي دغه ولایت کې د یاد سیسټم د پلي کولو په برخه کې د افغانستان بانک چارواکو ته د همکارۍ ډاډ ورکوي او وايي، چمتو دي چې خلکو ته په نورو برخو کې هم اسانتیاوې برابرې کړي.
د بلخ مرستیال والي مولوي نورالهادي ابو ادریس وايي: « د بلخ ولایت مقام ژمن دی چې د افغانستان بانک او نورو اړوند ادارو له خوا خلکو ته د پیسو د لاسرسي په تړاو اسانتیاوې رامنځته کړي، موږ به هڅه وکړو چې نه یوازې د دغو اسانتیاوو له رامنځته کېدو سره همکاري وکړو، بلکې هڅه کوو چې خلکو ته هم په دې برخه کې روزنه ورکړو.»
د افغانستان بانک چارواکي زیاتوي، تېر کال د هېواد په یو شمېر لرې پرتو ولسوالیو کې هم بانکي خدمات پیل شوي او هڅه کېږي چې ټولو ولسوالیو کې خلکو ته د خدماتو وړاندې کولو په موخه څانګې پرانیزي.
