د صنعت او سوداګرۍ وزارت د افغانستان پر صادراتو د امریکا له لوري د تعرفې لوړولو په غبرګون کې وايي، دغه پرېکړه د افغانانو، لاسي صنایعو، کوچنیو سوداګرو او سوداګرو ښځو ته زیان رسوي.
له دې وزارت په خپره شوې خبرپاڼه کې له امریکا غوښتل شوي چې له افغانستان سره د صادراتو او سوداګریزو اړیکو په برخه کې د ملاتړ رغنده چلن وکړي.
د صنعت او سوداګرۍ وزارت ویاند اخندزاده عبدالسلام جواد په دې اړه وايي: « په دې وروستیو کې د امریکا حکومت د افغانستان په ګډون پر یو شمېر هېوادونو ل۱۰ سلنه تعرفه وضع کړه. افغانستان په وچه کې راګیر هېواد دی او د سوداګرۍ نړیوال سازمان غړیتوب لري. د متحده ایالاتو دا ډول اقدام به د افغانستان ټولو خلکو، لاسي صنایعو، د سوداګرۍ پیلولو، کوچنیو تصدیو او په ځانګړې توګه ښځینه سوداګرو ته زیان ورسوي. دېته په کتو چې افغانستان یو اړ او مخ پر ودې هېواد دی، دا ډول سوداګریز فشارونه کولی شي د هېواد اقتصادي ودې پر وړاندې خنډ رامنځته کړي. افغانستان له امريکا په بېلابېلو برخو کې د وسايلو، تجهيزاتو او نوې ټکنالوژۍ واردولو ته اړتيا لري، په داسې حال کې چې د افغانستان له خوا پر يادو توکو تعرفه صفر ټاکل شوې او دغه هېواد د صادروونکو هېوادونو لپاره غوره تعرفه ګڼلې ده. له همدې امله موږ د امریکا متحده ایالاتو او نورو هېوادونو له حکومتونو صمیمانه غوښتنه کوو چې له افغانستان سره د صادراتو او سوداګریزو تعاملاتو په برخه کې رغنده او ملاتړي اړیکې ولري، ترڅو افغانستان وکولی شي د نړۍ په سوداګرۍ کې فعال او اغېزمن رول ولوبوي.»
د امريکا ولسمشر ډونالډ ټرمپ تېره اوونۍ د يو شمېر هېوادونو پر صادراتي توکو د تعرفې لوړولو په لېست کې افغانستان هم شامل کړ او په دې توګه امريکا ته د افغاني توکو پر صادراتو ۱۰ سلنه تعرفه لوړه شوه.
د پانګونې او سوداګرۍ خونې مالومات ښيي چې افغانستان د امریکا متحد ته تر ډېره لاسي صنایع، وچه مېوه او غالۍ صادوي.
