نړیوالو رسنیو په غزه کې د روغتیايي بنسټونو له قوله راپور ورکړی چې په دې تړانګه کې اسراییلي ځواکونو د نسل وژونې بریدونو ترڅنګ، پر ملکي وګړو د خوړو، څښاک اوبو او درملو رسولو ټولې لارې تړلي دي.
په راپورونو کې راغلي، له تېرې ورځې راهیسې اسراییلي ځواکونو په هوايي بریدونو کې د ماشومانو او ښځو په ګډون له ۵۰ زیات فلسطینیان شهیدان او لسګونه نور یې ژوبل کړي دي.
د فلسطین لپاره د ملګرو ملتونو د کډوالۍ دفتر کمېشنر فېلېپ لازاریني د ماشومانو ملاتړ لپاره د ملګرو ملتونو وجهي صندوق(یونیسف) د موندنو پر بنسټ خبر ورکړی چې د روان زېږدیز کال د مارچ له ۱۸ راهیسې، اسراییلي ځواکونو هره ورځ په غزې کې شاوخوا ۱۰۰ فلسطیني ماشومانو ته هم مرګ ژوبله اړولې.
هغه زیاته کړې: « مشروط اوربند د ماشومانو ژوندي پاتې کېدو ته فرصت و، خو پر غزې د اسراییلي ځواکونو بیا ځلې بریدونو پیل هره ورځ شاوخوا ۱۰۰ ماشومانو ته مرګ ژوبله اړولې. د ماشومانو په نښه کول د بشریت پر مخ یو تور داغ دی. د هغوی د وژلو لپاره هېڅ توجیه وجود نه لري.»
په ورته مهال د بریټانیا د بهرنیو چارو وزير ډېویډ لمي د اسراییلو له لوري د دې هېواد د پارلمان پر دوو غړیو اسراییلو ته د سفر بندیز غندلی او له هوايي ډګره يې د بېرته ستنولو په غبرګون کې، د اسراییلو حکومت له هغوی سره پر ناسم چلن تورن کړی او په غزې کې د جګړې پر بشپړ پای ته رسولو یې ټینګار کړی.
هغه زیاته کړې:« د اسراییلو په حکومت کې مو خپلو سیالانو ته په ډاګه کړې ده چې د بریټانیا پارلمان غړیو سره داسې چلن ورته د منلو نه دی. موږ د پارلمان له دواړو غړیو سره خبرې وکړې او د هغوی پوره ملاتړ به وکړو.»
سکای نيوز ټلویزیون د اسراییلو د کډوالۍ وزارت له قوله راپور کې ویلي، یون یانګ او ابتیسام محمد د بریټانیا پارلمان دوه هغه غړې دي چې د اسراییلو امنیتي وضعیت او د دې هېواد حکومت پر وړاندې د عامو اسراییلي وګړو د درېځ مستند کولو لپاره یې له لندن څخه تل ابیب ته سفر درلود.
بله خوا، ټاکل شوې نن دوشنبه(د اپرېل اوومه) د اسراییلو لومړی وزیر بینیامین نتنیاهو د امریکا له ولسمشر ډونالډ ټرمپ سره د خبرو لپاره واشنګټن ته سفر وکړي.
د اسرایيلو لومړي وزير دفتر ویلي، د نتنياهو او ټرمپ د خبرو اجنډا به د امریکا له لوري پر اسراییلي توکو تعرفې، د اسراییلو او ترکیې اړیکې او له حماس غورځنګ څخه د برمته اسراییلیانو ازادول وي.
د اسراییلو لومړي وزیر دفتر دغه راز ویلي: « لومړی وزیر د ولسمشر ټرمپ تودې او شخصي اړیکې ستايي او له ټرمپ مننه کوي چې د نړیوالو تعرفو له وضع کېدو وروسته یې له نتنیاهو سره لومړی کتنه پلان کړه. لومړی وزیر نتنیاهو به دوشنبه د ټرمپ په بلنه واشنګټن ته سفر وکړي.»
امریکا اسراییلو ته په منځني ختیځ کې د خونړیو هوايي او ځمکنيو بریدونو لپاره پوځي امکانات چمتو کوي.
د ۲۰۲۵ زېږدیز کال د فبرورۍ پر ۵ مه د اسراییلو لومړي وزیر بینیامین نتنیاهو او د امریکا ولسمشر ډونالډ ټرمپ په لومړۍ کتنه کې د امریکا ولسمشر حماس اسلامي غورځنګ ته خبرداری ورکړی و، که برمته اسراییلي وګړي بې قید او شرطه آزاد نه کړي، غزې تړانګه به ورته پر دوزخ بدله کړي.
د مارچ پر ۱۸مه په غزه کې د اسراییلي ځواکونو د مشروط اوربند له پای ته رسېدلو وروسته، نږدې ۱۵۰۰ فلسطیني وګړي شهیدان شوي او زرګونه نور ټپیان شوي دي.
